Storumsbakken nytt problemområde

Bildeserie:

1 av 5

I fjor haust blei det oppdaga omfattande mengder ulovleg dumping av restavfall langs enkelte vegar i Os.

Denne veka fekk Midtsiden tips frå ein turgåar som reagerte på store mengder avfall ved ein nyare oppstillingsplass på ein skogsveg i Storumsbakken.

– Her flyt det med alt frå kjøleskap til leikar, det ser heilt forferdeleg ut, seier innringaren.

Midtsiden tok ein tur til Storum og hadde ikkje problem med å finna den ulovlege søpppelfyllinga.

Også i Langedalen, der Os kommune hjelpte grunneigar i fjor og fjerna 1,1 tonn med ulovleg avfall, har det tatt seg opp igjen. Ved E39 i Hjellemarka ligg avfallet vi skreiv om i november framleis og flyt i skråninga utanfor kontrollsona.

– Vil på synfaring

Seks Bir-kommunar, blant anna Os, har oppretta avtale med Bir for å få hjelp til små og store private avfallsproblem. Bir har blant anna brukt flyfoto for å avdekka oppsamling av boss, gamle bilar og rustne traktorar, og anna potensielt miljøfarleg avfall folk har ståande.

– Vi har kome eit stykke med det arbeidet. Det har blant anna gått ut brev til fleire innbyggarar, fortel komminikasjonsrådgjevar Tina Skudal i Bir.

– Men dette på Storum er ei anna sak, her er det neppe grunneigar sjølv som har dumpa. Likevel er det, sjølv om det verkar urettvist, grunneigar sitt ansvar å få det fjerna.

Bir seier dei vil i dialog med grunneigar og at det kan bli aktuelt at dei hjelper til.

– Vi har eigne kontrollørar som kan gå gjennom avfallet. Først og fremst handlar det om å prøva å få tak i forsøplaren, og det hender innimellom at vi klarer det.

Risikerer bot og erstatningskrav

Om Bir fjernar ulovleg avfall kjem rekninga til syndaren gjerne på 2000 kroner for innsatsen og for administrativt arbeid. Er det omfattande forsøpling blir rekninga fort større.

Den som har kasta avfallet kan også bli bøtelagt for forureining.

– Men først må grunneigar melda det til oss, seier politioverbetjent Audun Hadler-Olsen.

Han kan ikkje på strak arm seia kor stor bot syndarane risikerer.

– Det kan vera vanskeleg å finna ut kven dette er. Men vi vil be folk, spesielt dei som ferdast rundt i Os på nattestid, for eksempel til og frå jobb, om å vera vakne og tipsa oss om dei ser noko som kan ha med ulovleg dumping å gjera.