Stum eller dum?
"Stum" dørseljar blei finta ut av ung jente.
Torsdag ettermiddag har det vore fleire utanlandske seljarar og tiggarar på dørene til folk i Os, Midtsiden fekk meldingar frå både Lyssand, Lekven og Øyane i 16-17-tida.
– Vi har vore ute og snakka med nokre av dei, fortel politioverbetjent Terje Sperrevik.
Billigast i Noreg?
På Lyssand var det ein som viste ein lapp der det sto at han var ein polsk stum medisinstudent som ikkje hadde råd til å fullføra studiet.
– Om han har dårleg råd kvifor studerer han ikkje i Polen då, undrast innringaren.
Eit mirakel på Lekven
Til same tid, på Lekven, var ei ung jente åleine då ein annan utlending banka på døra.
– Han viste ein lapp der det sto at han heiter Peter og er polsk og var stum. Han trengte pengar til høyreapparat.
Jenta sa at ho ikkje hadde pengar i huset, og utan å veta det så vippa ho den "stumme" tiggaren av pinnen ved å seia "hade!".
– Trur du ikkje han svarte "bye!". Han var ikkje meir døv og stum enn at han tok høfleg farvel med dottera vår, ler faren.