Lokal | 05. apr. 2016

Stygge vårteikn pregar Os

– Kunne dei ikkje heller ha gjeve vekk desse skia? undrast Nils Eivind Søfteland, ein av fleire som irriterer seg over ulovleg dumping av avfall i påsken.

Turgåarar og andre reagerer på boss (f.v.) på Ulven, langs Storestraumen og ved returpunktet ved Joker Søfteland. (Lesarbilde)
Kjetil Vasby Bruarøy
Kjetil Vasby Bruarøytirsdag 05. apr. 2016 19:43

Enkelte har tydelegvis brukt påske- og vinterferie til rydding i heimen, men nokre gjev framleis blaffen i kvar dei kastar avfallet sitt.

På eitt døgn har Midtsiden fått tre uavhengige meldingar med bilde av ulovleg dumpa boss.

Éin av lesarane har sendt oss bilde av ein heil salong som er dumpa ved avkøyrsla mot Skyttarhuset på Ulven, ein annan irriterer seg over at det framleis er eit stort problem med dumping langs E39 i Storestraumen.

Les òg: Bosset flyt langs E39 (frå november 2014)

– Eg har vore ute og gått langs Osvassdraget på Søfteland i dag. Os kommune og Bjørn Gangstø har sett opp ei ny, flott bru, og elva er nydeleg, men neimen om skråningen nedanfor Hjellemarka er det no, seier ei som meiner ho er ein av mange frustrerte turgåarar.

– Svinestien er kjemetrist å sjå, det må vel gå an å rydda opp. Eventuelt får vegvesenet stenga av heile kontrollfeltet når det ikkje er i bruk, meiner ho.

– Har tatt fleire på fersk gjerning

Ein annan stad på Søfteland, ved Joker-butikken, har Hovland Transport tatt ansvar og fjerna ulovleg dumpa avfall ved returpunkt.

– Eg jobbar for Hovland Transport, og firmaet tok rekninga, seier Nils Eivind Søfteland, ein av grunneigarane i området rundt butikken.

– Eg har tatt folk på fersk gjerning fleire gongar, både her og i Langedalen. Han eine sto eg og tok bilde av fram til han hadde tatt alt i bilen igjen. Han var så sløv at det einaste han unnskyldte seg med var «det er vel nokon som kjem og fjernar det».

– Alt kostar pengar, folk er frekke som kastar denne utgifta over på andre. Det som var dumpa no i ferien var blant anna fleire ting folk fint kunne selt eller gjeve vekk via Facebook eller andre stadar.

Ny kampanje startar 18. april

Teknisk sjef Marianne Kramer er fortvilt over situasjonen.

– Dessverre er dette eit vanleg problem no om våren, folk rydder, men enkelte kastar på feil plass.

Os kommune har i samarbeid med Bir hatt tilsyn og fått vekk både bilvrak og anna, men nytt avfall dukker opp.

Det er grunneigar sitt ansvar å rydda. I problemområdet i Storestraumen er det Statens vegvesen og tre privatpersonar som er grunneigarar.

– No startar snart Bir sin Hold Norge reint-kampanje. Der kan russ og andre skuleelevar, barnehagar, idrettslag og andre delta om dei vil hjelpa til med å rydda, seier Kramer.

Kampanjen går frå 18. april til 6. mai. Les meir om denne på Bir.no. (OBS: Av omsyn til tryggleik inkluderer ikkje dugnaden bossplukking langs offentleg veg).

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.