Over hundre gutar og jenter i ungdomsskulealder spelte futsal i Os Idrettspark utover fredagskvelden. (Foto: Kjetil Vasby Bruarøy)

Suksess med ny ungdomsturnering

Osbadet og Os Fotball fylte Os Idrettspark med aktivitet til over midnatt.

image
image
image
image
image
image
image
image
image
image
image
image
Av: Kjetil Vasby Bruarøy

Fredag kveld gjekk Os Futsalcup av stabelen for første gong.

– Vi har arrangert futsalcup i Oshallen før, for vaksne, men ikkje ei ungdomsturnering som denne - og i ein så stor skala, seier Endre Brenne frå Os Fotball.

24 lag var påmeldt. Spelarane har sett saman eigne lag, nokre av dei på tvers av klubbar. Spelararne kom frå både lokale klubbar som Os, Lysekloster, Nore Neset og Søfteland - og tilreisande frå blant andre Loddefjord, Olsvik og Åsane.

– Frå før har vi Eat Move Sleep for born frå 6 til 12 år, og MidtsidenCup for vaksne. No vil vi etablera dette som ein årleg cup for spelarar i ungdomsskulealder.

– Det opnar seg jo heilt andre sjansar når vi no har utvida frå éin til tre fulle hallar på Kuventræ.

Fotball og bading

Markus Bremar Pettersen frå Osbadet gler seg stort over å vera vertsskap og medarrangør.

– For det første er det veldig kult med så mange ungdomar i huset på éin kveld, for det andre blir det kjekt å fylla bassengområdet med langt over 100 ungdomar.

Cupen har nemleg ein god time fellespause frå fotball, der alle spelarane får slappa av med bading.

– Vi har rigga det opp som ei nattbading, men i kveld er det berre for deltakarane i cupen, fortel Markus.

Finalar etter midnatt

Etter ein dukkert heldt cupen fram. Dei siste finalane starta klokka 00.15.

Laga var delte i ulike klassar, G13, G14, G15/16 og J15/16.

– Futsal-reglar for senior er noko kompliserte, blant anna med kor mange gongar keeper kan bruka nevane. Vi har forenkla det litt, men basert det på hovudelementa i futsal.

– Cupen skal bli eit årleg arrangement. Det er lagt til rette for at den kan veksa med endå fleire lag neste år, seier Brenne.

Vinnarane av Os Futsalcup 2018
G13: Loddefjord
G14: Åsane Rebels
G15/16: GOATs G16 (frå Os)
J15/16: Honolulu FC (frå Os)

Fleire saker