Sur og konsentrert

- Han har fanga meg sånn eg ser ut, seier Magne Lunde om portrettet av han sjølv som blei avduka i kveld.

Av: Kjetil Vasby Bruarøy

Torsdag kveld var det vernissasje på YriOs. Rundt 25 kunstnarar stiller ut i Visningssenteret, som framover mot jul kjem til å ha fleire arrangement som i dag, med musikk i kombinasjon med utstilling.

SJÅ VIDEO NEDST I ARTIKKELEN

Opninga i kveld starta med avduking av Jarl Hugo Låstad sitt portrett av trommespelar og osing Magne Lunde. Bergensmusikaren Helge Nilsen sto for avdukinga, av to Magne Lund-ar på same lerret.

- Nei, det er ikkje Edvard Grieg, det er Magne som speler Edvard Grieg, forklarte Låstad.

Blei vist på BBC
Kunstnaren har mala Lunde som Grieg i svart-kvitt i bakgrunnen på hovudportrettet.

- Det var i starten av 90-talet eg spelte Grieg i filmen «Til fjells med Grieg». Den blei vist i utlandet også, ein kamerat av meg som var på Stones-konsert i London i 1994 såg filmen på BBC då han vakna dagen derpå. Då ringte han til meg, fortel Magne til Midtsiden.no.

Ville klippa Magne
Låstad fortel at han har visst kven Magne var sidan slutten på 60-talet.

- Far til Magne dreiv skipshandel i Bergen, og Magne leverte varer med mopeden sin. Eg jobba på båt og eg hugsar at nokre av dei andre om bord sa at dei ville klippa det langhåra mopedbodet. Eg syntes det var dumt sagt, seier Jarl Hugo.

Sidan har kunstnaren følgt med Magne i media, men det var først no i sommar, på ein grillfest i Os, at dei møttest og Låstad spurte om å få mala trommespelaren.

Portrett nummer to
Under Nore Neset Dagane i september blei første versjon utstilt. Det var ei mindre utgåve, denne skal ifølgje både kunstnar og Lunde sjølv vera ei forbetra utgåve.

- Eg bestemte meg tidleg for at det skulle vera same positur, men nokre justeringar er gjort, i tillegg er dette større, det var eit sånt portrett eg i utgangspunktet ville mala.

Magne sjølv har ikkje sett resultatet før avdukinga i kveld.

- Ei ære
Jarl Hugo synes at Lunde har eit uttrykksfylt og levande ansikt, Lunde sjølv synes det er ei ære å bli portrettert.

- Han har fanga meg akkurat som eg er når eg speler, sur og konsentrert. Eg har spelt trommer i 43 år, men blir stadig meir nervøs før eg skal på scenen.

- Før ein konsert liker eg å gå litt rundt, eg liker å vera for meg sjølv. Når eg speler ser eg ikkje publikum, det er som å vera i transe.

VIDEO: Sjå avdukinga, deler av trommesolo av Lunde og ein rask rundtur i resten av utstillinga. (Foto: Kjetil Vasby Bruarøy)

Fleire saker