Svaneunge med gøtt i halsen - måse med mutter (!) rundt nebbet

Observante bubilturistar på Steinneset meldte fredag ettermiddag frå om svaneunge med fiskesnøre i nebbet.

Bjørnafjorden brann og redning rykte ut for å prøva å hjelpa svaneungen.

– Det har vore både skade og sjukdom på svaner i Os hamn før, så vi har håven klar, seier fungerande brannsjef Erik Walden.

Å lokka til seg flokken, og å fanga den aktuelle svana, var enkelt.

– Er det ein fiskekrok i enden?

– Vi ville vera varsame, sidan vi ikkje visste om det var krok i enden av snøret. Gøttet sat fast, så vi tok svaneungen med til Os Dyreklinikk.

Det blei svaneungen undersøkt. Det blei tatt røntgen, som viste at det ikkje var krok på snøret, men gøttet var truleg kome gjennom mage og ned i tarm, og var vanskeleg å få opp.

– I staden blei det kutta så langt nede i halsen som mogleg, med håp om at resten kjem ut den andre vegen, og at fiskesnøret ikkje blir til bry for svaneungen.

Svaneungen blei levert tilbake til familien ved Oselvarnaustet.

Mens den fekk hjelp nytta kollega Aleksandra Kamieniecka sjansen til ein forebyggande prat med bubilgjestane, som blant anna fekk røykvarslarar tildelt, i tråd med «sikker ferie i Bjørnafjorden»-kampanjen.

Bevisst dyrplageri?

Tidlegare denne veka blei ein utmagra måse funnen i live av ein privatperson.

Han såg at måsen hadde ein mutter rundt nebbet, og fekk avliva fuglen.

– Det var berre bein og fjør igjen på den. Fuglen hadde ikkje sjanse å opna nebbet, og har nok hatt det vondt i fleire dagar.

Meldar lurer på om mutteren rundt nebbet er bevisst dyrplageri.

– For det første er det vanskeleg å sjå for seg korleis måsen skulle fått denne på, for det andre viser det tydelege spor etter gjengene i nebbet, som at den var skrudd på.

– Men det er samtidig vanskeleg å sjå for seg at nokon kan vera så sadist at dei fangar ein måse og skrur ein mutter rundt nebbet hans.

Små gjenstandar kan vera alvor for andre

Erik Walden seier begge episodane er ein påminnar om at vi menneske bør bli flinkare å rydda etter oss, og meir klar over kva konsekvensar bosset vårt kan få for dyreliv og natur.

– No har knopsvanene i årevis klart å oppdra nye kull i Os hamn, i år er det heile seks ungar foreldreparet har klart å fostra opp. Då er det synd om slurv av folk skal vera eit hinder for desse og andre artar, seier Walden.