Sverre sikra fram til OL i Beijing

Etter ein OL-sesong med bronse og gull lausnar endeleg sponsormarknaden for Sverre Lunde Pedersen. Før OL i Pyeongchang sto han utan hovudsponsor, noko som gjorde at det blei starta kronerulling for osingen gjennom aksjonen «På glattisen med Sverre».

– Vi kom vel opp i rundt 120.000 kroner, fortalde ein av initiativtakarane Fredrik Schmidt Fotland då Lunde Pedersen blei feira i Oseana i slutten av april.

– Gir meg tryggleik

No har Noregs Skøyteforbund og Sverre Lunde Pedersen teikna ei avtale med Kredinor SA som inneber at selskapet blir hovudsponsor for Lunde Pedersen fram til og med OL i Beijing i 2022.

– Ei langsiktig avtale med Kredinor er heilt avgjerande for mi vidare satsing og gir meg den tryggleiken eg treng for å nå nye mål i åra som kjem. Eg er veldig glad og stolt over å ha Kredinor med på laget mot OL i 2022, seier Sverre Lunde Pedersen i ei pressemelding.

– Sverre representerer gode verdiar

Avtalen kjem som ein følgje av dei svært gode resultata Lunde Pedersen viste denne vinteren. I avtalen ligg det at han vil jobba for Kredinor på utvalde arrangement utanom idrettsesongen. Avtalen gjer at han kan konsentrera seg om det som er viktigst i høgsesongen, nemleg å konkurrera om å vinne medaljar i tråd med dei ambisiøse måla han har får meisterskapa fram til og med OL 2022.

– Kredinor har inngått avtalen med Sverre fordi han som oss ønskjer å bli best, og fordi Sverre representerer verdiar vi også står for som seriøsitet, engasjement, mot og begeistring, seier Tor Berntsen, administrerande direktør i Kredinor.

– Han forstår at lagarbeid er vegen til sukesess også for ein skøyteløpar som utøver individuell idrett. Skøyter er historisk ein nasjonalsport i Norge og Kredinor, med sine 113 år på nakken, vil i Oscar Mathiesens, Hjallis, Kupperns og Koss sin ånd, bidra til å få fram ein ny norsk skøytekonge; Sverre Lunde Pedersen.

Forbilde og inspirator

Sverre Lunde Pedersen kjem til å treffe dei ansatte og eigarane ved ulike anledningar og vil bli heia fram av desse når han er i gang med skøytesesongen igjen.

– Sverre har dei eigenskapane selskapet ønskjer å bli assosiert med og vil fungere som eit godt forbilde og inspirator for dei tilsette. han er ein usedvanleg dyktig og hyggeleg idrettsutøvar som set seg ambisiøse mål, jobbar hardt og er ein lagspelar som ikkje gir seg, sjølv om han møter motgang. Dette gir Sverre Lunde Pedersen dei aller beste føresetnadene til å bli uslåeleg i åra som kjem, seier Ingjerd Thurmer, marknadssjef i Kredinor i pressemeldinga.