Syklist påkøyrd av lastebil
Sendt til Haukeland i ambulanse etter samanstøyt i rundkøyring.
Ein syklist blei skadd i samanstøyt med ein lastebil torsdag ettermiddag.
Midtsiden fekk tips om ulykka klokka 15.20. Tjue minutt seinare fortalte politiet at ulykka skjedde i låg fart, og at syklisten var køyrd til Haukeland i ambulanse.
– Vedkomande, ein mann i 60-åra frå Bergen, var bevisst. Men han hadde nokre skadar, seier politiet på staden.
Ulykka skjedde i rundkøyringa mellom Byvegen og Industrivegen.
– Lastebilen kom frå Bergen og skulle mot Svegatjørn og vidare til Halhjem. Bilførar er ein mann i 50-åra. Det er ikkje mistanke om promille, og det er heller ikkje tatt beslag i førarkortet hans.
– Det er førebels uklart kva retning syklisten hadde, men det kan sjå ut som om han òg kom frå Bergen og skulle mot Halhjem.