Kultur | 29. okt. 2020

Tåpelig sin rølp endar med album

Lasse Stangvik og Martin Aadland meiner alvor med musikken.

Tåpelig sin rølp endar med album
Bandet «Tåpelig» består av Lasse Stangvik og Martin Aadland, her under Fadderfestivalen i Stavanger. (Foto: Privat)
Ørjan Håland
Ørjan Hålandtorsdag 29. okt. 2020 09:36

Det starta sjølvsagt på gutterommet for Lasse Stangvik og Martin Aadland. Dei var begge glad i musikk og bestemte seg for å starta si eiga gruppe.

Namnet på gruppa enda på «Tåpelig», og dei fekk ein pangstart med sin første låt,«Tysnesfist», som vart svært populær på campusområdet på Tysnesfest 2019.

– Kvart år er det éin låt som blir spelt mykje på festivalcampen, og blir ein slags årets «campuslåt». Då det nærma seg Tysnesfest i fjor bestemte vi oss for å prøva å laga årets campuslåt, fortel Lasse.

– Å laga musikk var nytt for oss, det var i grunnen noko vi ikkje hadde lært oss heilt enno. Men vi skrapa saman mange ville, men sanne historiar, og putta på noko beats. I løpet av Tysnesfest merkte vi at fleire og fleire grupperingar på campusen spelte låten vår. Det var kjempegøy!

Debuten gav meirsmak. Denne hausten har Lasse starta på musikklinje på Noroff, mens Martin vart ferdig på Noroff i vår og har no starta på Music Business i Rena.

Ikkje berre er Lasse og Martin opptekne av å laga musikk, dei er også glad i sportsfiske. (Foto: Privat)
Ikkje berre er Lasse og Martin opptekne av å laga musikk, dei er også glad i sportsfiske. (Foto: Privat)

Festivaldebut og sceneskrekk

Etter ein opptur på Tysnesfest spreidde ordet seg. Så kom eit spennande tilbod.

– Midtvegs i den sommaren var det ein kompis av meg som hadde litt ansvar med å arrangera Fadderfestivalen i Stavanger. I Stavanger køyrer dei endå meir på enn i Bergen, der blir det nesten som ein festival.

– Vi blei då spurd om å spela eit kvarter på den festivalen. På det tidspunktet hadde vi berre den eine låten, så vi skunda oss i studio og laga mykje rart som skulle fylla dette kvarteret.

– Det er jo 5.000 deltakarar på den festivalen, men då vi var på scenen, satt alle på benkar på sidene. Eg kjente godt på nervøsiteten i forkant av konserten, men då det heile starta så var det berre kjekt. Heldigvis hadde vi med oss nokre kompisar, dei plasserte seg foran scenen og kasta litt glans, humrar Lasse.

Det kokte godt blant dei som møtte opp på Fadderfestivalen i Stavanger. (Foto: Privat)
Det kokte godt blant dei som møtte opp på Fadderfestivalen i Stavanger. (Foto: Privat)

Blod på tann

Med positive opplevingar både på Tysnesfest og på Fadderuken i Stavanger, vart dei lokale gutane inspirerte til å fortsetja med musikken.

– Etter oppturen på Tysnesfest, og det å stå på ei scene og spela i Stavanger, fekk vi blod på tann. Då bestemte vi oss for å laga eit album.

Første låten på det komande albumet, Tequila, blir sleppt på strøymetenester i dag.

– Tequila handlar om ei stygg personleg oppleving i samband med det mexicanske brennevinet. Det er i grunn ein rølpelåt med tekst som er sann, mens resten av albumet har fleire rolege låtar. Dei er fortsatt gøye låtar, men ikkje nødvendigvis like rølpete som Tequila og Tysnesfist, lover Lasse.

– Folk skal ikkje ta til tårene når de høyrer på musikken vår, vi ønskjer jo å ha det gøy, påpeikar Lasse.

Viss alt går etter planen vil Tåpelig sitt album vera klart til våren 2021.

– No gir vi først ut Tequila, rett før jul kjem ein singel til, og så skal vi få ut ein singel kort tid etter nyttår òg. Albumet ser vi for oss blir klart i løpet av mars eller april neste år, seier Lasse.

Tåpelig siktar seg inn til å ferdigstilla eit heilt album til våren 2021. (Foto: Privat)
Tåpelig siktar seg inn til å ferdigstilla eit heilt album til våren 2021. (Foto: Privat)

Vil styra unna russelåt-stil

Dei unge musikarane er i stadig utvikling, og innrømmer at dei i grunn er på leit etter sin eigen stil.

– Det vi lagar no om dagane er hip-hop, kanskje litt nyare type indie hip-hop. Mens Tysnesfist var meir ein type russesang, og det er eigentleg ikkje det vi ønskjer å forbindast med.

– Vi prøver i grunn å finna oss sjølv, men hip-hop er nok der vi ferdast mest, forklarer Lasse.

Her kan du høyre Tåpelig sin ferskaste singel, Tequila:

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.