Tappar for mykje vatn

Frå tid til anna opplever teknisk eining at nokon som er knytt til vassbehandlingsanlegget i Søvik bruker så mykje vatn på kort tid at alarmen går, mellom anna på UV-aggregatet som skal sørgje for at vatnet du tapper i krana er reint.

– UV-filteret fungerer slik at vatnet skal ha ei viss opphaldstid i aggregatet for å bli reinsa. Når det blir tappa så store mengder samstundes som det blei i går, så får ikkje vatnet denne tida og alarmen går, forklarar Marianne Kramer, leiar for teknisk drift i Os kommune.

Meir enn ein hageslange

Når alarmen går må kommunen rykka ut med ekstra personell for å ta hand om situasjonen og i verste fall vil ikkje vatnet som går ut frå reinseanlegget vera forskriftsmessig reinsa.

– Vassbehandlingsanlegget taklar altså ikkje stormtapping, og skal ein ta ut større vassmengder, så bør ein bruka tid og tappa rolig.

– Men kor store mengder er det snakk om. Skjer det om eg set hageslangen på fullt trøkk?

– Nei, det er nok større mengder enn som så. Det skal tåla fullt trykk på hageslangen. Det er nok meir i størrelse på det ein får ut av ein brannhydrant.

– Vi har freista å finne ut kor dette har skjedd når alarmen har gått, men så langt har vi ikkje lukkast i å finna det ut.

– Eg vil difor be dei som treng nytta store mengder vatn om å ta kontakt med oss på tekniske tenester på førehand slik at vi kan få gitt dei naudsynte instruksane. Det er ikkje lov å tappa frå hydrantar med mindre det er gitt ein spesiell tillatelse til det, påpeiker Kramer.