Jan Haaland og Randi Hjertass er to av dei ni kunstnarane i samarbeidet KIOS. (Foto: Kjetil Vasby Bruarøy)
Jan Haaland og Randi Hjertass er to av dei ni kunstnarane i samarbeidet KIOS. (Foto: Kjetil Vasby Bruarøy)

Tar imot publikum på atelieret

Ni kunstnarar med fast opningstid kvar søndag.

Kjetil Vasby Bruarøy
12. januar 2020 - 9:41

Samarbeidet «Kunstfabrikken i Os (KIOS)» starta i 2013, og flytta frå Askvikneset til Os sentrum i 2017. Etter eit år i Os Næringspark flytta dei på tampen av 2018 til andre etasje i «Interiøren» i Hamnevegen.

Eit initiativ før jul gav sånn respons at atelieret no opnar dørene med fast opningstid kvar søndag - frå i dag.

Ei vellykka løype

KIOS ved Randi Hjertaas tok initiat til ei «kunstløype» under julemarknadsdagane, ei løype som starta i Vognshallen, der Anne Gro Starefoss Greve stilte ut, og heldt fram via Bente Haugland sitt atelier i Os stasjon og over brua til KIOS og naboen KOS (Kunst og Sånn) i etasjen over Os Fargehandel.

– Det kom veldig mykje folk, og vi fekk veldig hyggelege tilbakemeldingar! Fleire av dei som var her spurde om ikkje vi kunne ha ope ftare, og til faste tider, fortel Randi.

No blir det sånn, midt på dagen kvar søndag.

– Med mindre alle kunstnarane er opptatt ein søndag, så sjekk innom Facebooksida vår før du reiser heimefrå. Nokre av oss er her ganske mykje både i kvardagen og i helgene, men tida med fast ope begrenser vi til 13-16.

Ein prat og ein kaffikopp

KIOS består i dag av ni kreative sjeler; Jan Haaland, Ann-Lisbeth Negård, Randi Hjertaas, Gro Fjeldtvedt, Rita Barstad, Rigmor Sletnes, Margunn Tveitnes, Anita Gudding Aslaksen og Siri-Janne Llanos.

– Det er alltid nokon av oss som er her, og frå no vil vi prøva å vera minst to i den faste opningstida, seier Jan Haaland.

– Det er jo eit ope atelier, ikkje ei utstilling, så folk kan gå rundt og sjå i bås etter bås i eige tempo.

– Sjølv om vi er her for å jobba, har vi naturlegvis tid til ein liten prat. Vi har òg kaffien klar.

Les meir om

Lokal Kultur