Tar Myrna om bord

Norsk-filipinske Myrna Braza skal spela på Bar2Be fredag. Men først skal ho halda ein minikonsert mellom spon og spant i Vognhallen.

– Vi har hatt mykje besøk medan vi jobbar, alt frå barnehagar og skuleklassar til grupper på 40 pensjonistar har vore innom. Det er veldig kjekt, synes båtbyggarane Hallgeir Bjørnevik og Bjørn Ådne Kvalvik.

Dei held på å bygga ein åttring, ein tradisjonsbåt frå Nordhordland som oppdraggjevar har ein over 10 år gamal, øydelagt variant av.

– Sidan vi har det så sosialt og fint her tenkte vi at vi skulle invitera til ein kosekveld med god musikk. Det var planen heile tida det, å laga litt stemning når vi først får låna den fine Vognhallen til prosjektet.

Høyrte Myrna på Midthordland

Då Bjørnevik og Kvalvik skulle bestilla musikk til kvelden hadde førstnemnte ei bestemt jente friskt i minne.

– Eg høyrte Myrna på bluescruise med MS Midthordland under Osøren Blues & Jazzfestival. Det var veldig fint og musikk heilt etter min smak.

Myrna har blant anna kjærasten Thomas «TomTom» Haugland på trommer og Olav Skorpen på bass.

– Så no blir det skjenking mellom båtane i Vognhallen?

– He, he - nei det blir det ikkje. Men det blir eplesider og peanøtter. Og så vil vi bruka rundt eit kvarter på å fortelja litt om prosjektet vårt og om dei andre båtane som står utstilte her, lover Hallgeir.

Konserten startar klokka 18 fredag ettermiddag.