Tar straumen i 375 hus på Strøno og Drange søndag

BKK Nett varslar straumutkopling på Drange søndag.

375 abonnentar mister straumen - planlagt utkopling er frå klokka 09.00 til 16.30.

Område som mister straumen er Drangsvegen, Drangsneset, Balandsneset, Vassvikvegen, Strønevegen og Skotøya. (Skorvatjørn var med i oppramsinga, men det er feil).

• Sjå òg: BKK Nett si oversikt over planlagte utkoplingar

– Alle kundane som mister straumen skal no vera varsla. Vi beklager ulempene dette eventuelt gir. Normalt prøver vi å utføra denne typen arbeid i kvardagane, men sidan mange sit på heimekontor i desse koronatider, tar vi det ein søndag, seier Eva Aarbakke Rognsvåg, prosjektleiar i BKK Nett.

Ved å ta det ein søndag slepp dei òg å uroa drifta til Drange Bruk eller Dranges Båtservice.

To nye trafokioskar

Årsaka til straumutkoplinga er at BKK Nett skal erstatta ein eldre trafokiosk på Drange med to nye. Den gamle trafokiosken står oppe i ei høg mast.

– Om ikkje vi skiftar ut denne trafokiosken, er det risiko for at folk i området blir straumlase i lengre tid ved eit eventuelt straumbrot, seier prosjektleiaren.

Etter orkanen «Nina» i januar 2015 var det Drange som hadde det verst, når det kjem til straumbrot.

– Nokre kundar i området har dessverre opplevd blinking i lysa i periodar. Årsaka er låg spenning. Dette problemet forsvinn når vi i morgon får dei to nye trafokioskane i drift.

– Arbeidet må gjerast i dagslys. Eigentleg er dette to jobbar, men vi har samla dei til éin dag, så kundane slepp å mista straumen to gongar.

Ti tilsette kjem til å vera i sving på og langs Drangsvegen i morgon.