Sissel Becker er nøgd med observasjonane og arbeidet patruljen gjorde i Os tysdag. (Foto: Kjetil Vasby Bruarøy)

Tatt med 143 liter brennevin og 50.000 sigarettar

To menn sikta: Ein årvaken patrulje kom over noko som leia til eit større beslag.

Av: Kjetil Vasby Bruarøy

Tysdag kveld slo politiet til mot ein bustad i Os.

I huset fann dei 143 liter brennevin, mellom 45.000 og 50.000 sigarettar (i 20-pakningar) og ein del øl.

– To menn blei pågripne. Den eine er sikta for oppbevaring og sal av smuglarvarer, den andre for kjøp og oppbevaring, fortel politioverbetjent Sissel Becker ved Os lensmannskontor.

Brennevinet er ikkje på plastkanner, men på noko som ser ut til å vera originale flasker og emballasje, men tydeleg utanlandske varer.

Fatta mistanke etter observasjonar

Det var ved eit slumpetreff at patruljen tysdag møtte ein mann i slutten av 40-åra. Mistenkeleg åtferd førte til vidare observasjon.

Dette leia dei vidare til den andre personen, som er i 50-åra. Det var i vedkomande sin bustad at dei fann dei store mengdene med alkohol og tobakk.

Dimittert etter avhøyr

Mannen i 40-åra blei dimittert etter avhøyr, mannen i 50-åra fekk ei natt i arresten. Begge er utanlandske statsborgarar. Ingen er varetektsfengsla.

– Begge har erkjent forholdet, opplyser Becker, nøgd med patruljen sin innsats og det store beslaget.

– Er dei òg mistenkte for smugling?

– Vi er framleis i starten på etterforskinga, så det er for tidleg å seia.

Fleire saker