Taxiane slit
Oppdatert: Problema skal vera løyst. Data- og telefonsystema til Bergen Taxi var nede i fire timar tysdag. Problema råkar Os Taxi også, men dei hadde ei mellombels løysing.
Oppdatert: I 1430-tida meldte Bergen Taxi at data- og telefoniproblema skulle vera løyste.
Bergen Taxi hadde store problem med data- og telefoniløysingane sine tysdag, noko som gjer at dei ikkje klarar å ta imot nye turar og i staden oppmodar kundane om å ringa konkurrentane.
Os Taxi kjøper systemløysingane frå Bergen Taxi og var difor råka av dei same problema.
- Det folk kan gjera er å ringa direkte hit til taxibua.
- Om nokon av oss er inne så tek vi telefonen og kan styra turen manuelt, men det er jo ikkje sikkert at vi er tilgjengeleg. Då må folk berre prøva litt seinare, fortel taxisjåførane på jobb då Midtsiden svinger innom.
Kontanter som gjeld
Som følgje av dataproblema nyttar det heller ikkje å bruke kredittkort eller andre elektroniske betalingsmiddel.
- I dag er det nok berre hard valuta som gjeld.
- Alle turane må betalast med kontantar, men folk får kvittering, forsikrar sjåførane.
Kor lenge dataproblema blir varande har dei ikkje fått noko meldingar på.
Fastkøyringa går som normalt
Er du ein av dei faste kundane til Os Taxi, til dømes skulekøyring og lignande, så treng du ikkje uroa deg.
- Vi skal ha kontroll på fastturane, dei ligg i bookingsystemet, så dei går si gang.