Thairestaurant under bygging

I mai i år fortalte Tore Lehrmann at han hadde fått ny leigetakar i lokalet i Telthuskvartalet.

Les òg: Her kjem restaurant

Sidan har det vore stille ei stund, men dei siste vekene har det vore byggearbeid i lokalet som Lehrmann's TV og Radio heldt til i fram til oktober i fjor.

– Vi hadde som mål å opna 1. september, men av ulike årsaker blei vi ikkje klare til den datoen.

– Men om alt klaffar med handverkarar og andre leveransar så klarer vi å opna i slutten av september, seier Marirosi Marcellin.

"Det er deilig"

Marcellin representerer firmaet Aroydee AS, eit firma som frå før eiger ein thairestuarant med same namn på Laksevåg i Bergen.

– Vi hadde samarbeid med eigar av restauranten i fleire år før vi i fjor overtok eigarskapen.

– "Aroydee" er eit thailandsk ord og betyr "det er deilig" eller "veldig god smak", legg han til.

Liker seg i Os

Restauranten i Bergen går godt og då Marcellin og familien ville opna nok ein restaurant peikte Os seg ut som aktuell destinasjon.

– Eg hadde ikkje noko forhold til Os anna enn at vi av og til har tatt oss ein tur til bygda og vore på kaien og ete is.

– Vi liker oss veldig godt i Os og kunne på sikt gjerne tenkja oss å flytta her til, seier Marirosi, som har budd i Bergen sidan han for 14 år sidan flytta til Noreg.

Kanskje sushi

Marcellin er frå Rwanda, men han og familien har fleire thailandske venar og er sjølv veldig glad i thaimat.

– Eg lager ikkje maten sjølv, vi leiger vi inn profesjonelle thailandske kokkar, fortel han.

Etter at dei overtok Aroydee i Bergen supplerte dei menyen med sushi.

– I utgangspunktet skal restauranten på Os bli som den på Laksevåg, men om vi skal ha sushi på menyen frå start, eller om vi skal venta litt, har vi ikkje bestemt oss for enno.

I lokalet har det skjedd ein del sidan sist, både med riving av veggar og bygging av skiljeveggar inne i det som om nokre veker er restaurantlokale.