Thrilleravslutting på serien for Os 2

Os 2 sikra opprykket til 4. divisjon med siger over Voss for to veker sidan.

Laurdag avslutta dei serien med heimekamp mot Varegg 2. Førstelaget til Varegg hamnar uansett utfall i siste runde på jumboplass og rykker ned frå 3. divisjon.

Varegg 2 kjempa om å unngå å rykka ned til 6. divisjon då dei stilte tungt på Kuventræ.

Os 2 låg på 2. plass, som er godt nok til opprykk, men kunne klatra til topps om serieleiar Osterøy skulle snubla i siste serierunde.

Snudde kampen

Første omgang blei jamn, med ein stor sjanse til Os i første del av omgangen, og fleire sjansar før pause. Men Varegg 2 skåra einaste mål før pause, frå spiss vinkel etter tett småspel i boks etter ein dødball.

– Heldigvis snudde vi det i andre omgang, seier trenar John Ole Johannessen.

Joachim Dale Fløysand utlikna, Markus Heggland Myrlid gav Os 2-1-leiing.

Så kom det to mål på overtid.

Varegg 2 utlikna i 93. minutt, Os 2 gjekk opp i 3-2 ved Christoffer Arntzen Eikaas i 94. minutt.

Os 2 - Varegg 2 3-2 (0-1)
Målskårarar, Os: Joachim Dale Fløysand, Markus Heggland Myrlid og Christoffer Arntzen Eikaas
Os 2-troppen: Ludvig Egge Drange, Thomas Felix Færøvik, Henrik Blindheim Skjælaaen, Baste Elias Moberg Træen, Christoffer Arntzen Eikaas, Marius Een Lyssand, Jonas Fagerbakke Hovland, Torgeir Lunde, Rafael Villén Villén, Joakim Kvernes Forstrønen, Joachim Dale Fløysand, Erlend Sørås Storebø, Fredrik Haustein, Anders Havsgård, Markus Heggland Myrlid, Oscar August Lekven Fimreite, Pål Rye Aasheim og Emre Durvaci.

Os 2 tangerer toppen - Varegg 2 berga plassen

Trass tap blei det fort jubel i Varegg-leiren.

To andre botnlag, Dale og Vaksdal, hadde spelt uavgjort og Varegg 2 berga plassen i 5. divisjon.

Os 2 kunne jubla over sigeren, men trass 2-2 mellom Osterøy og Voss klatra dei ikkje heilt til topps på tabellen.

• Tabell, 5. div. avd. 2 (fotball.no)

Osterøy og Os 2 enda likt med 56 poeng kvar, men Osterøy har tre poeng betre målforskjell (73-26 mot 80-36).