Sport | 18. mai 2012

Thuen mistar toppkampane

Os møter Arna-Bjørnar på Kuventræ i morgon og Haugesund 2 i neste heimekamp. Talentet Egil Thuen (16), som har vore skadd sidan før sesongstart, blir ikkje klar til nokre av dei.

Thuen mistar toppkampane
Egil Thuen hadde ein kjempegod vinter med A-laget, men skadde seg før sesongstart. No håper han at tida som tilskodar snart er over. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyfredag 18. mai 2012 12:01

Alt låg an til at vi skulle få sjå Egil Thuen (16) på A-laget denne våren. Egil spelte for både gutelag, juniorlag og Os 2 i fjor. Å også spela for A-laget blei for tungt. I år er han veldig klar for 3. divisjon.

Men det eksplosive talentet er ute med skade og må vera publikum også mot Arna-Bjørnar i morgon.

– Eg føler meg frisk og det kriblar etter å spela no.

– Men eg har fått ulike beskjedar etter at eg tok MR av kneet. Først sa dei at eg måtte rekna med å venta tre månadar, så fekk eg plutseleg beskjed om at eg kunne trena igjen.

– Så blei det eit par økter med laget, og det følte eg gjekk fint, men så fekk eg ordre om å halda meg i ro i to veker, sa Thuen til Midtsiden medan Os slo Skjold 6-0 førre helg.

– Synd for laget - synd for Egil

Skaden kom då Egil vrei kneet i ei landing etter ei takling i kamp for juniorlaget til Os i Varegg Cup i mars. Han skadde korsbandet på baksida av kneet og kan no berre driva med styrketrening.

Før den tid rakk han å spela fleire treningskampar med A-laget. Der blei det både skåringar og spontanapplaus etter gode duellar.

– Egil har nokre ekstremferdigheiter. Han har eit voldsomt rykk og så skyt han veldig bra. Og han skyt bra med begge bein, seier trenar Tim Henrik Sperrevik.

Saman med Fredrik Heggland og Frode Øvredal utgjer Thuen, etter at han kom frå Nore Neset til Os, den sterkaste talent-trioen frå 95-årgangen i bygda.

– I tillegg til å vera talentfull er Egil ein veldig kjekk spelar å ha på trening, med god innsats og godt humør. Det er synd for både laget og for Egil sjølv at han fekk sesongstart på tribunen, men vi får håpa vi snart har han med oss igjen, seier Sperrevik.

Frå 13-0 til toppkamp

Laurdag (kl 16) møter Os på 2. plass Arna-Bjørnar på 3. plass til toppkamp på Kuventræ.

– Utfordringa for vår del blir å omstilla oss etter to kampar på rad mot svak motstand, seier Tim.

Os har 13-0 i målforskjell etter kamp mot Avaldsnes og Skjold. Og dei kunne fint ha skåra meir mot begge.

– I morgon får vi nok ikkje så mange sjansar, så då må vi vera meir effektive.

Viktig periode for Os

Os spelte 0-0 borte mot Åkra, men har elles vunne alt og har med +17 best målforskjell etter dei første 5 kampane. Anders Kloven har berre sleppt inn 2 mål på 5 kampar for Os.

Men Sandnes Ulf 2 har vunne alle sine og toppar tabellen framfor Os og morgondagens motstandar, Arna-Bjørnar, som har skåra mest denne sesongen.

TABELL 3. DIV AVD. 7
(etter 5 rundar. Målforskjell i parantes.)
1. Sandnes Ulf 2 (18 - 8) 15 poeng
2. Os (19 - 2) 13 poeng
3. Arna-Bjørnar (21 - 7) 12 poeng
4. Haugesund 2 (16 - 4) 12 poeng
5. Bjarg (11 - 4) 12 poeng
6. Stavanger (10 - 14) 9 poeng
7. Varegg (13 - 10) 7 poeng
8. Stord (13 - 14) 7 poeng
9. Åkra (10 - 10) 5 poeng
10. Austevoll (11 - 14) 4 poeng
11. Kopervik (5 - 10) 3 poeng
12. Avaldsnes (7 - 24) 3 poeng
13. Tertnes (5 - 18) 0 poeng
14. Skjold (2 - 22) 0 poeng

– I dei neste fem kampane etter Arna-Bjørnar møter vi blant anna Haugesund 2 og Sandnes Ulf 2. I tillegg er det fleire av dei andre betre laga som møter kvarandre, som Bjarg mot Sandnes Ulf 2 på måndag.

– Dei neste vekene vil det truleg bli eit tydelegare skilje mellom topp og midten på tabellen, så viss vi skal vera med i toppen må vi vinna kampar som den vi får på heimebane i morgon, seier Tim Henrik Sperrevik.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.