Brynjar Øvstedal klar for Heerenveen

Til Heerenveen med Jimmy sin lur

VIDEO: – Med denne luren har Jimmy brølt Os opp i førstedivisjon. No vil eg brøla Sverre fram til VM-gull, seier Brynjar Øvstedal.

image
image
image
image
Av: Kjetil Vasby Bruarøy

Den som har Brynjar Øvstedal i ryggen yter som oftast litt ekstra. Med brennande entusiasme og ei røyst som får notebasane i Austevoll til å høyrast ut som sopranar, er Brynjar ein ruvande figur same kva tribune han står på.

SJÅ VIDEO NEDST I ARTIKKELEN

No skal han til Heerenveen saman med broren Dag og kameratane Harald Askvik, Kjell Arne Hjelle og Arne Hansen for å heia Sverre fram til VM-gull. Som ekstrautstyr har han fått låna med seg Jimmy Øvredal sin lur, ein lur laga av Anfinn Eide på 60-talet for at Jimmyen skulle brøla fotballaget til Os frå tredje til øvste nivå i norsk fotball.

– Eg har dessverre ikkje tid til å vera med til Os for overrekking i dag, men Brynjar må berre låna luren, og bruka den med han er god til, seier Jimmy til Midtsisiden.

– Luren står dessutan hos Valter Midtsæter no, luren er eigentleg hans etter at han kasta seg etter nokre Brann-supportarar på motorsykkel då dei stal luren ein gong på 80-talet, fortel Jimmy.

Brann-supportarane hadde nok lagt merke til den på Kuventræ og kjørte inn i Øvredalen og fann den bak geithuset på garden. Valter, som ikkje hadde sertifikat på bil, kjørte etter på lett motorsykkel og fekk tatt registreringsnummeret på bilen.

– Tanken var god, dei skulle jo heia på Brann. Men Os er viktigast og luren skal brukast når det er osingar som skal heiast fram. Dei fekk seg nok ei god overhaling, for det viste seg at dei hadde lånt faren sin bil på tjuvtoktet til Øvredal.

– Om eg hadde Trond Mohn sine milliardar

Midtsiden var i dag med Brynjar og Harald til Steinneset og henta luren hos Valter. Så gjekk turen til Banktjørn, eit vatn med skøyteis eit steinkast frå bustaden til Sverre Lunde Pedersen.

I videointervjuet under kan du sjå kva Brynjar meiner om Sverre sitt talent, forholda han har trent seg opp på, nokre strofar om fotball og litt testing av luren i retning fotballegenda Norvald Kinden sitt hus i motsett ende av vatnet. Brynjar gjev også Mohn eit tips til pengebruk.

Kanskje får du også eit inntrykk av kva stemning Brynjar med følgje kjem til å laga i Heerenveen til helga.

– Eg har også fått sponsor. Henken (Henrik Askvik) var innom med Askeladden-klistremerke som eg skal ha på luren, pins og pengar. Eg møtte Henken med ein gjeng kameratar då vi i fjor var i Vikingskipet og såg Sverre. Det blei eit eventyr av ein togtur, synd at ikkje heile den gjengen òg skal nedover til Holland, seier Brynjar.

VIDEO (04:17): Sjå Brynjar snakka om fotball, skøytesport og Sverre Lunde Pederssen. (Foto: Kjetil Vasby Bruarøy)

Fleire saker