Formann i Os Dykkerklubb Bjørn Tore Bøhmer. (Foto: Andris Hamre)
Formann i Os Dykkerklubb Bjørn Tore Bøhmer. (Foto: Andris Hamre)

Tilbyr prøvedykk

Os Dykkerklubb, som fyller 35 år i 2012 stiller ut med eigen tank på vårsleppet.

Kjetil Vasby Bruarøy
25. april 2012 - 14:52

– Vi vil informera om klubben og kanskje klarer vi å lokka fleire med oss ned i den spennande verda som er under vasskorpa, seier leiar i Os Dykkerklubb, Bjørn Tore Bøhmer.

Dykkarklubben stiller ut saman med Nemo, som driv kurssenter og dykkarbutikk på Laksevågneset, under årets vårslepp i Os.

– Nemo tar med seg litt utstyr for sal, i tillegg tar dei imot bestillinger på kurs, fortel Bøhmer.

Vil du pusta under vatn?

Har du nokosinne lagt med dykkarmaske og snorkel og sett ned på livet i sjøen? Kanskje til og med dukka ned for å sjå nærmare på noko, men få sekund seinare skunda deg til overflata igjen, for å pusta? Kva om du kunne blitt verande ei stund under vatn?

– Det er stort å oppleva det å symja rundt nær botnen utan å måtte gå opp etter luft.

– På Vårsleppet tar vi med tank som folk kan prøva seg i. Kanskje kan vi også ta testdykk med instruktør ute i Hamna.

Har alltid nokon å dykka med

Os Dykkarklubb har rett over 30 medlemmar. Meir enn halvparten av desse er aktive med minst 3-4 dykk i månaden.

– I tillegg til potensielle komande dykkarar trur eg det er mange tidlegare dykkarar i Os. Det hadde vore kjekt om vi klarte å få nokre av desse til å finna fram flaskesettet igjen.

Enkelte legg symjeføtene på hylla fordi dei ikkje har nokon å dykka med.

– Det er unødvendig. I tillegg til faste dykk onsdagar og dei fleste laurdagane året gjennom har klubben ei varslingstenste der vi sender melding til alle medlemmane om det er nokon som søkjer ein å dykka med akkurat den dagen.

Heldig klubb

Bøhmer sjølv visst ikkje at Os hadde eigen dykkarklubb før han for tre år sidan tok dykkarsertifikat.

– Klubben har mykje å by på, både av fine dykkarterreng  og av utstyr. Vi har eigen kompressor til luftfylling, den står i Oselvarverkstaden i Os sentrum. Klubben har også eigen båt som tar 10 dykkarar med utstyr. Den ligg i brygga til Oselvarverkstaden.

Os Dykkerklubb blei etablert i 1977.

7 kilo eksklusiv filet

Dykkarformannen byrja som fridykkar, men fann etter ei stund ut av at han ville ha lengre tid på botnen.

– Eg blei raskt veldig fascinert av livet under havskorpa. Eg liker undervannsjakt godt og har hatt fleire fine fangstar, som då eg tok ein breiflabb på 21 kilo.

Fangsten blei det 7 kilo filet av, fiskemiddag verdt rundt 2000 kroner.

– Men det er også mykje anna spennande i havet, anten du vil fanga fersk sjømat eller berre sjå på livet. Eit kurs på ei cirka veke er alt som skal til, seier Bjørn Tore Bøhmer frå Os Dykkerklubb.