Tjuvar stakk til skogs

- Vi har gode bilde av begge to, seier kjøpmann Trond Hope, som reagerte med å stenga butikken for gymnaselevar.

Kjetil Vasby Bruarøyonsdag 27. okt. 2010 13:21

- No er vi lei av elevar som stel i butikken, dette er eit problem kvar haust når boblejakkane kjem på, seier kjøpmann Trond Hope.

- Det kjem rundt 100 elevar inn i butikken på ein gong, og steling skjer dessverre ofte. Eg skjønar ikkje at dei tør eller vil, vi ser ikkje alt, men fattar vi mistanke så har vi alt som skjer i butikken på band.

Stenger for elevar
I dag blei to elevar tatt på fersk gjerning. Elevane sprang frå staden, men butikken har krystallklåre bilde av ansikta deira.

- Dei skal få ein sjanse til å melda seg. Fram til då er butikken stengt på dagtid for alle elevar frå Os Gymnas.

- Unngår dei å bli meldt til politiet om dei innrømmer tjuveriet?

- Nei. Alle som blir tatt for steling i butikkane våre blir meldt, seier Hope bestemt.

Panta butikken sin kasse
Begge Rema 1000-butikkane i Os har god kameraovervaking. Av opptaka ser vi både Red Bull-tjuveriet og panting av ein bruskasse som allereie sto i butikken.

Først førte dei kassen med beina, så plukka dei den opp, leverte den til ein av dei tilsette og ba om pant, og fekk så pantelappen.

- Dei merka nok at betjeninga fatta mistanke om at ikkje kassen var deira, for dei leverte ikkje pantelappen i kassen.

Sprang frå staden
Dei to gutane gjekk gjennom kassen utan å kjøpa noko som helst. Betjeninga hadde sett at dei bar på nokre Red Bull-boksar, og gjekk etter dei ut av butikken.

- Då sprang dei. Eg følgte etter, bak butikken og vidare på sykkelstien langs Byvegen og så ut i skogen der dei tok kvar sin veg. Då gav eg opp, fortel butikksjefen i Idrettsvegen.

Etterpå sjekka dei kameraopptaka. Der såg dei både tjuveriet, pantesvindelen og ansikta til begge gutane.