Tjuven slo til mens tømraren jobba

Onsdag ettermiddag blei Midtsiden kontakta med ei etterlysing. Mens vi skreiv om tjuveriet blei tjuvgodset funne.

– Ein kamerat av meg som hjelpte meg med å leita fann radioen i ei grøft nær Hamnevegen, fortel Bjarte Nøstdal frå BN Byggservice AS.

Han var på oppdrag for eigarane av lokalet då han i 17-tida oppdaga at radioen hans var vekke.

– Radioen sto på, men eg jobba i motsett ende av lokalet, nærmast drosjebua. Eg er likevel overraska over at noko kom inn i rommet og stal radioen, som sto på, mens eg var der.

Sensorane på skyvedørene er kopla av etter at jernvaren til S Tvedt på seinsommaren la ned, men tjuven nølte tydelegvis ikkje på å skubba døra open.

– Det er ein litt kostbar radio til rundt 4000 kroner, så vi tok oss nokre rundar på Os for å sjå om vi fann han. Det gjorde vi heldigvis, seier Bjarte, om episoden som fortel at det skal litt til for å passa godt nok på tinga sine.

Har leigetakar på ein tredel av lokalet

Etter at S Tvedt AS la ned jernvare og leikebutikk å sommar, har lokalet til leikebutikken blitt leigd ut til ein butikk med eksotiske matvarer.

No er også ein knapp tredel av jernvarelokalet leigd ut.

– Vi deler lokalet i tre. Det midterste lokalet, rundt 110-120 kvadratmeter, har fått leigetakar, seier Tove Tvedt Skarstein, ein av dei tre søstrene som eig AS Sentrumskvartalet Os.

Samla sett er lokalet på rundt 450 kvadratmeter. Lokalet har frå før tre inngangsdører, inngangsdøra mot sør (drosjebua) blei brukt som lagerinngang av jernvaren.