Tøffe jenter trassa regnet

Bildeserie:

1 av 6

Laurdag var det tid for årets jentefotballdag på Kuventræ. Rekruttering- og treningsarrangementet, som er eit samarbeidsprosjekt mellom fleire idrettslag i Os, har blitt stadig meir attraktivt.

– I fjor fekk vi plass til alle dei 260 påmeldte, i år var jentefotballdagen fullteikna på 50 timar. Vi hadde i tillegg 35 på venteliste, fortel Eirik André Hesthamar frå IL Øyglimt.

Han er ein av eldsjelene i arrangørgruppa som laurdag tok imot den store mengda nye og komande jentefotballspelarar mellom 5 og 10 år i alder.

– Det blir meir romsleg neste år, når det er tre kunstgrasbanar på Kuventræ.

Imponerande oppmøte

Med ei lang, samanhengande regnbyge frå morgon til kveld var arrangørane spente på kor mange som ville dukka opp.

– Jentefotballdagen er gratis, og då er terskelen gjerne lågare for å ikkje stilla.

– Men så og seia alle kom, eg trur vi var 260 av 265 påmeldte. Det imponerer meg at både jentene og foreldra har så gode haldningar.

Fleire 5 år gamle jenter hadde si første fotballtrening i striregnet laurdag.

Under tak før skjema

Jentefotballdagen varte frå klokka 12.30 til klokka 19, med oppmøte og utdeling av tskjorter og ball blei følgt opp med oppstilling for fotografering før treninga starta.

– Planen var å trena frå klokka 13.30 til 16, men i 15-tida var dei så våte, og fleire av dei yngste så kalde, at vi bestemte oss for å framskynda discoteket.

Spelarane marsjerte inn i Oshallen ein time før skjema. Også måltidet blei tatt innandørs i staden for i telt.

– I Oshallen hadde vi hoppeslott og diskotek. Det var også veldig populært at DJ Doffen (Kristoffer Karlsen Hjertholm frå Os Rockeklubb), i tillegg til å vera DJ, sette seg på ein krakk og spelte akustisk.

– Han blei sett på som ei rockstjerne, eg veit ikkje kor mange autografar han skreiv på armane til jentene. Dette med show og underhaldning var spelarane veldig klare for, også CheeriOs hadde ei flott oppvising.

– Det blei dessverre ltt mindre fotball i år enn i fjor, men det viktigaste var å ta godt vare på jentene, at det blei ein god dag. Så får vi håpa at mange av desse finn seg ein plass i idrettslaget i eigen heimkrins.

– Det er veldig mange unge jenter som speler fotball i Os for tida, og mange flinke unge spelarar stiller også opp som hjelpeinstruktørar. Det betyr mykje for desse yngste, seier Eirik André.