Tøft av «Team Patricia»

Over 130 dansarar hylla Michael Jackson. VIDEO: Sjå samandrag av showet.

Kjetil Vasby Bruarøy
Kjetil Vasby Bruarøylørdag 12. juni 2010 19:54

Annakvart år set danselærarinne Patricia Langeland opp show med elevane hennar frå Os kulturskule. Onsdag var det generalprøve, torsdag og fredag heldt rundt 135 av dei ei flott framsyning med Michael Jackson som tema.

VIDEO: Gjekk du glipp av framsyninga? Nedst kan du sjå eit 8-9 minutt langt samandrag. (Trykk på firkant nedst i høgre hjørne for fullskjermvising).

- Alle utanom dei aller yngste er med. Sjølv om vi er mange så glir det av seg sjølv, med god hjelp av disiplin og kjærleik, seier Patricia.

Motown i «Mounthome»
Store deler av spekteret blei dansa etter, frå Motown-låtar som «I want you back» og «Rockin Robin», til røffare «Beat it» og «Bad».

Fjellheim, «Mounthome», var fullsett både torsdag og fredag. Kostyme og koreografi sto i stil med låtene og musikkvideoane, og dansarane, som er frå 10 år og oppover i alder framsto som samla og samkjørte.

- Vi legg det opp til at alle skal klara det, alle skal blomstra, også når dei er store grupper på scenen.

Bukett til Julie
Innimellom fekk vi mindre grupper og solodans, blant anna av Julie Bergesen, som i sommar reiser til London for å ta bachelor grad i dans ved Laban School of Contemporary Dance.

- Takk for at du har blåst litt ekstra kultur inn i Osbygdo, sa Benjamin Langeland,som mellom nokre av innslaga fortalte om Michael Jackson og karrieren hans.

Øvingane og forbilda
Dei fleste elevane har øvd på showet i to-tre månadar, nokre av dei sidan nyttår.

- Éin ting er det som skjer på scenen, noko anna er øvingane og livet bak sceneteppet. Det har vore så positivt å ha alle elevane samla, ikkje minst for dei unge, som har fått noko å strekka seg etter og nokon å sjå opp til.

Ikkje sliten
Showet blei avslutta med med 135 dansarar kledd i kvitt. Til ståande applaus. Då folk hadde sett seg understreka Patricia at ho ikkje har fått dette til åleine. Ved sida av å takka Knut Vidar Garlid, Hallgeir Bjørnevik og Jonny Haugland, retta ho ei stor takk for støtta frå foreldra til elevane.

- Eg blir så rørt når eg ser kva dei presterer, korleis dei er med kvarandre og kor fine tilbakemeldingar dei får. Folk trur kanskje at eg blir sliten av å førebu eit slikt show, men med desse ungdomane kunne eg hatt framsyning fleire veker på rad, seier Patricia Langeland.

Lover bra!
Det lover bra for framtida i nytt kulturhus, Oseana. Dette strålande danseshowet føyer seg inn i rekkja av dei mange gode og populære framsyningane vi har sett i Fjellheim dei siste månadane, av ulike formar scenekunst. Fleire av dei har knapt hatt plass til foreldre og søsken av utøvarane.

Kulturlivet i Os har for lengst vakse seg ut av dagens fasilitetar - og publikum er så stort at fleire av framsyningane omtrent må haldast hemmeleg fram til det er over.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.