Tok 11 syndarar i 3 kontrollar
Politiet hadde fartskontroll på både Lepsøyvegen og Lyseklostervegen onsdag.
Politiet har fokus på trafikk denne veka, og i går gjennomførte dei tre fartskontrollar med laser.
– Éin patrulje hadde kontroll på Lepsøyvegen ved Os Lakk og Karosseri frå klokka 12.40, ein annan var tilbake klokka 17.50, og hadde i tillegg kontroll på Lyseklostervegen veg Ulven leir frå klokka 19.50, fortel politioverbetjent Anne Lyssand.
Sånn blei resultatet:
Lepsøyvegen, 50-sone: To reaksjonar midt på dagen, der høgaste fart var 62 km/t, noko som fører til forelegg på 3800 kroner. På kvelden var det sju reaksjonar, der høgaste fart var 68 km/t, som resulterer i 5500 kroner i forelegg.
Lyseklostervegen, 50-sone: To reaksjonar, der høgaste fart var 60 km/t, som gir 2100 kroner i forelegg.
Utan førarkort - med narkotika
Også utrykningspolitiet patruljerte i Os i går. I Mobergsbakken stoppa dei ein bilist som ikkje har førarkort.
I tillegg blei det funne mindre mengder amfetamin i bilen. Bilførar blei tatt med for blodprøvetaking og er meldt for både køyring utan gyldig førarkort og for oppbevaring av narkotika.
Vedkomande er ein mann i midten av 30-åra med adresse i ein annan kommune enn Os.