Tok ei natt i Os

Bildeserie:

1 av 6

Onsdag i førre veke starta turen, tysdag klokka 18 kom Bård Alfred Monsen, Tor Wigum og Vegar Solberg fram til Os og til kai i Søre Øyane.

- Vi tok ei natt heime, første overnatting i seng så langt på turen. Vi lukta nok ikkje godt då vi kom i land, men det kom seg etter ein dusj, seier Bård.

Både Bård og Tor har erfaring frå konkurranseroing. Begge fekk fleire medaljar i NM og har deltatt i både verdscup og VM før dei la opp i 2004. Vegar har ikkje rodd aktivt, han har erfaring som aktiv boksar.

Låg vêrfast
Ideen om å ro det 2165 kilometer lange strekket kom for nokre år sidan, men først då dei i fjor sommar bestilte seg ein oselvar blei det alvor. Egil Meland frå Tysnes har bygd båten, som er forsterka med eit ekstra bord, regattakeipar og sete på skjener.

- Så var det start førre onsdag, og turen starta med regn og mykje vind. Vi prøver å ligga på 30 til 50 nautiske mil for dagen, men den eine dagen var det så mykje motvind at vi berre rodde 8 mil.

Resten av turen har vore i finvêr, og den rundt 80 mil lange turen frå Stavanger til Os gjekk unna på to dagar.

Til torsdag hadde roarane lagt bak seg rundt 200 av 1170 nautiske mil.

Torsk og sel
Det går i sjokolade og bananer om bord. Færrast mogleg stopp, gutane er fokuserte på å "banka mil", et medan dei ror og pissar i ausekaret.

- Men den første dagen var det ein fiskar som kjørte tett på oss og slengte ein torsk om bord. Det blei første middagen vår, fortel Tor.

Vegar løftar om bord pose etter pose fullstappa med Real Turmat.

- Det er godt, men eg har ete så mykje av det no at eg byrjar å gå lei.

Utanom torsken som kom fykande om bord er møtet med sel det nærmaste dei har kome nærkontakt med fisk og dyr.

- Vi rodde forbi Jæren, og der er nokre rullesteinar vi måtte passa oss for. Plutseleg såg eg ein stor stein framfor båten, men det viste seg heldigvis å vera ein sel. Selen flytta seg og vi kom oss fint vidare.

Har det litt travelt
Tor innrømmer at dei ligg litt bak skjema etter motvind og bølgjer på Sørlandet tvang dei til å ligga innaskjers fleire timar.

- Eg er den einaste som har noko eg skal nå, 25. juli skal eg i bryllaup til ein kamerat, fortel han.

Kva dei gjer om tida blir knapp på slutten er roarane ikkje einige om.

- Vi kan setja han i land og ro vidare, eller setja han i land og ta ein pause til han kjem opp igjen. Begge alternativ er kjipe, så vi får satsa på å koma oss til Nordkapp i god tid før han må på flyet, seier Bård.

Oselvaren skal ta Hurtigruta heim. Etter turen skal den seljast.

Oppdatering på nett
På roturen.com kan du lesa meir om turen. Ein GPS-sendar oppdaterer sida kvart tiande minutt, med kvar dei er. I tillegg har gutane med seg pc og trådlaus nett, så dei kan legga ut bilde og tekst frå turen.

- Vi gløymde leidningen til kamera, så vi fekk ikkje lagt opp bilde før vi var på Os, men no er den med, så det blir fleire oppdateringar i vekene som kjem, seier Tor.

Følg med på roturen.com

- På nettsida skal vi også laga til informasjon om korleis du kan stemma på oselvaren som Noregs nasjonalbåt. Det hadde vore flott om den fekk tittelen, så folk må hugsa å stemma i heile sommar, seier Bård Alfred Monsen før han legg frå land mellom Røttingen og Brattholmen.

Vil du stemma på oselvaren sender du BÅT 2 til 2225.