Tok ein twist i Tropehagen

Os Fotball serverte mat, mote, musikk, dans og trikseoppvising på Luranetunet onsdag.

Kjetil Vasby Bruarøy
14. mars 2019 - 10:47

For fjerde år på rad arrangerte Os Fotball i går ein kveld for eldre innbyggarar i Os. Det starta i Os Eldresenter i 2016, i 2018 fekk dei Eat Move Sleep-pris for innsats for eldre i 2017, og dei to siste åra har dei arrangert hyggekveld i Tropehagen i Luranetunet.

Herre- og damelaget stiller saman med ein dugnadsstyrke opp for å delta med servering og som dansepartnarar. I går var eksterne krefter som Jeanett Borgen Kallekleiv med butikken Borg Vêr på plass for å visa vårmote, Eirik Søfteland for å spela, og Sondre Ødegård Aksnes for å triksa.

Først var det quiz, eller spørrekonkurranse, som strandebarmingen Endre Brenne kalte det denne kvelden. Deltakarane svarte på spørsmålsalternativa ved anten å ha hendene på fanget eller på hovudet. Til slutt sto han igjen med tre vinnarar.

Bebuarar og besøkande kasta seg i dansen

– Eg har spelt fotball før, for Nordnes og Viggo, seier ein av dei som var mest imponert over trikseshowet til Aksnes, Øyvind Linde.

– Og eg har vore på dans i Fjellheim, fortalde han, før han blei ropt opp som ein av tre finalistar i dansekonkurransen.

Der gjekk han, saman med Marita Arentzen, heilt til topps! Amanda Troøen tok 2. plass saman med Henry Matland, Marius Mikkelsen og Sara Bruarøy kom på 3. plass.

– Å bidra i lokalsamfunnet, og å få sånne fine møte mellom generasjonar, har blitt ein tradisjon som har stor verdi for oss i Os Fotball. Eg vil takka leiinga og dei tilsette ved Luranetunet, som både slepp oss til her, og som hjelper oss med å gjennomføra arrangementet, seier dagleg leiar og hovudtrenar Endre Brenne.

Sjå stemningsrapport i videoruta og bildeserien over.