Tok fri frå jobb for å bada i sjøen

Dagleg leiar i AdO Arena, Håkon Andree Egeberg Johansen frå Os huka tak i ein sambygding då han skulle ha arrangement på Nordnes Sjøbad.

– Det som er kjekt med Arne er at han er gal på ein underhaldande og hyggeleg måte, seier Håkon om Veim Haugland, som blant anna har deltatt i VM i dødsing fleire gongar.

Arrangementet på Nordnes Sjøbad skulle berre vera ei lita markering av at AdO Arena har tatt over drifta av det 108 år gamle badet. AdO-shefen inviterte til isbading, og garderte seg ved å be Arne koma og dødsa.

– Min nest kaldaste dukkert

– Eg tok sein lunsj og stakk frå kontoret i 1,5 time, seier eigedomsmeklaren.

– Det var ein halv grad i sjøen, eg har ikkje bada i så kaldt vatn på mange år.

Den kaldaste badeopplevinga han har hatt var i null gradar i Oselvo då han gjekk i 9. klasse.

– Eg har aldri drive fast med isbading anna enn ein periode i ungdomen då eg bestemte meg for å bada minst éin gong i månaden året rundt. No var det lenge sidan sist. Det var sjølvsagt forfriskande, og om du klarer å slappa litt av så er det godt med eit isbad.

Artikkelen held fram under videoen:

Nytt liv til gamalt bad

Arne var ikkje åleine om å møta fram på Nordnes i går, 58 isbadarar tok seg ein dukkert under AdO si markering.

• Les òg: Stupte ned i kuldehavet (BA.no)

Nordnes Sjøbad, som blei bygd i 1910, har blitt drive av Bergen kommune frå 1920 til no.

AdO Arena vil både utvida opningstidene, laga fleire arrangement (bland anna dødsing), opna kiosk og skaffa fleire solsenger - for å gjera sjøbadet meir attraktivt.