Frode og Jonathan Haugan med den 169 cm lange fangsten. (Foto: Kjetil Vasby Bruarøy)

Tok kveite på 169 cm

I starten på garnet, på 3 meters djupne, sat denne store kveita så vidt fast i garnet.

image
image
image
image
Av: Kjetil Vasby Bruarøy

– Dette har eg drøymd om i 30 år, seier Frode Haugan, som saman med sonen Jonathan har hatt ein svært god start på denne solrike søndagen.

I går fekk dei ein fin havål og nokre store krabbar, før dei reiste ut i dag sa kona Kjersti at dei ikkje trengte å venta seg like god fangst i dag.

– Den hang så vidt fast i garnet med kjeften, men eg fekk handa mi inn i hjellene og drog den opp. Eg måtte bruka heile kroppsvekta mi og la meg bak i båten for å få fisken om bord.

Han kan vera glad for at dei fiskar frå ein båt med låg ripe, ein 14 fot Askeladden.

Då kveita var om bord sa han til sonen Jonathan (16); «nyt det, for dette blir einaste gong du får oppleva ein sånn fangst».

Vekt: 72 kilo!

Fangsten blei tatt ved eit skjer nord for Skorpo, i trollgarn på rundt 3 meters djupne.

Midtsiden hadde meterstokk med til brygga i dag, og vi målte kveita til 169 cm.

– Eg har ei vekt som går til 50 kilo, den er nok ikkje vits å bruka. Vi skal ta kveita med til MS Molly (båten som Frode jobbar på) og vega han der.

– Ut frå tabell så skal den vera rundt 70 kilo når den har denne lengda.

Oppdatert: Kveita har vore på vekta - den vog 72 kilo!

Vil selja til lokal restaurant

Etter at fisken er vegd skal den på is hos ein yrkesfiskar i Os.

Far og son Haugan har ikkje plan om å eta fisken sjølv, dei vil ringa til både restaurantar og fiskeforhandlarar i nærleiken for å høyra om dei vil kjøpa den.

– Kjekk hobby

Frode jobbar turnus med to veker på og to veker av.

Når han har fri er han og sonen ivrige med å fiska med garn og teiner.

Det er ikkje første gong dei får ekstra spennande fangst, i januar 2012 fekk dei ein månefisk i garnet.

– Månefisken er den mest spesielle fisken vi har fått, men dette er klart den største. Førre rekord var kanskje ein torsk på 22 kilo, seier Jonathan.

Fleire saker