Tok laks på 18 kilo!

Rekordfisk tatt i Oselvo: Tysdag litt før klokka 21 landa Eivind Aasen ein laks på utrulege 18 kilo. – Dette var veldig spesielt, seier den lykkelege fiskaren.

Eivind Aasen kunne glisa breitt etter å ha fått på land ein laks på 18 kilo litt før klokka 21 tysdag kveld (foto: Andris Hamre)
Andris Hamretirsdag 20. aug. 2013 22:39

Dei siste dagane har det vore tatt fleire store laks i Oselvo, mellom anna for vel ei veke sidan då Os-keeper Anders Kloven tok ein på 8,8 kg.

Etter det har Hugo Hjelle landa ein på 12,2 kg på Tøsdal og Jan Rotnes ein på 12 kg i Kvernhushølen.

Tysdag var det Eivind Aasen som skulle få den store opplevinga då han fekk napp i sone 2.

– Eg sto og kasta litt på autopilot og var eigentleg litt lei, då den hogg til.

– Eg tenkte det var berre å halda ut, for eg visste jo at det var fisk uti her, seier ein lykkeleg Eivind Aasen.

Stakk nedover

Laksen beit på ein raud og gul spinner med blankt blad.

– Han beit rett utanfor hytta i sone 2 og ville gå nedover etter at den var på kroken.

– Eg sette tommellen på snella, sette sjøbein og rygga bakover. Eg var sikker på at eg skulle mista den, men den sat godt på kroken.

- Kor lang tid brukte du å få rekordfangsten på land?

– Eg veit ikkje, dei seier det tok mellom fem og ti minutt. Du veit eg mista heilt omgrep om tid.

– Heldigvis var Tore Engelsen Moberg i nærleiken og kunne hjelpa meg med å få den i håven og på land, smiler Aasen.

Den største på 30 år?

Aasen sin fangst på 18 kilo er den største i Oselvo på mange år.

Men den skal ikkje vera den einaste som er tatt i denne vektklassen. Etter det Midtsiden kjenner til blei det tatt nokre laksar på 17 til 19 kilo i slutten av 70-talet og starten på 80-talet.

Det skal også gå rykte om ein fangst på 24 kilo på 1930-talet ein gong.

– Er det den største du har fått?

– Nei, eg har ein på 18 kg frå Stryn tidlegare. Men dette var noko heilt anna og ei veldig spesiell oppleving.

– Oselvo er noko for seg sjølv, meiner Aasen.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Knappe 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.