Tok sølv i Sogndal

Bildeserie:

1 av 3

I helga gjekk Sognefjord Lerum Cup av stabelen. Fleire lag frå Os deltok og dei som gjorde det best i sluttspelet var 2001-årgangen på gutesida.

– Det er eit bra kull. Vi reiste opp med to lag med til saman 29 spelarar, seier trenar Thomas Maltun.

Os 1 starta med 1-1 mot Loddefjord i innleiande rundar og følgte opp med å slå Øystese 4-3 og Ørsta 6-0.

20-0 på to kampar

Mens Os 2 hamna i B-sluttspelet, der dei tapte kvartfinalen, vann Os 1 6-4 i 1/8-finalen og heile 12-0 over Spjelkavik i kvarten.

I semifinalen sto Smørås for tur. Her blei det 8-0-siger.

– Dessverre fekk vi ein tøff start på finalen med straffe imot og ein og annan dommaravgjerd som gjorde gutane litt frustrerte. Vi hamna på 2. plass bak Fana i serien og måtte dessverre sjå oss slått også i Sogndal, seier Maltun.

Nokre av gutane får ein hektisk seinsommar med allianselaget, som skal til Hamar Cup, og med gutar 16, som skal til Norway Cup.

Gode jenter i same årgang

Os jenter 14 gjorde det også bra i innleiande rundar, der dei slo Førde og Arna-Bjørnar og spelte uavgjort mot Voss.

Men i kvartfinalen rauk dei ut for Sogndal (0-4).

Jenter 13 kom også til kvartfinale, der dei spelte 1-1 mot NBK, men rauk ut på mengde cornarar.

Gutar 13 tok seg også til A-sluttspel, men rauk ut i 1/8-finalen.