Tok «uhøgtidelege» medaljar i AdO

I helga var svømmeanlegget Alexander Dale Oen Arena eitt år, og dagleg leiar Håkon A. E. Johansen frå Os hadde sambygdingar med seg på markeringa.

– Vi var ein gjeng som stilte opp for å ha eit show i dødsing. Sidan det var ein danske der så kalte vi det like gjerne nordisk meisterskap, seier Arne Veim Haugland.

Arne, som fekk sølv i VM i dødsing i august, fekk delt 3. plass. Osingen Andreas Olsen fekk delt 1. plass med dansken.

Osingar på pallen og i juryen

– Det var 12 deltakarar, 7 av oss som stupte frå 10 meter, dei andre frå 7- og 5-meteren.

– Andreas var knallgod! skryter Arne, nøgd med at begge frå «Bjørnafjorden Dødsing» hamna på pallen.

To av dei tre i juryen var òg frå Os, AdO-sjefen og handbaklegenda Arne Thuen.