Sport | 03. jan. 2018

Toppskårar Kanestrøm gir seg på Os

Erik Kanestrøm (25) har vore toppskårar for Os 5 av dei 6 siste sesongane. Han speler ikkje for Os i år.

Toppskårar Kanestrøm gir seg på Os
Erik Kanestrøm etter to skåringar i 7-1-siger over Tertnes i 2016. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyonsdag 03. jan. 2018 12:49

Bildeserie:

Kanestrøm som 17-åring, for Os mot Trio i 2009. (Foto: KVB)
Kanestrøm som 17-åring, for Os mot Trio i 2009. (Foto: KVB)
Os kan også mista venstrefot Knut Spangelo Haga. (Foto: KVB)
Os kan også mista venstrefot Knut Spangelo Haga. (Foto: KVB)
1 av 2
Kanestrøm som 17-åring, for Os mot Trio i 2009. (Foto: KVB)
Os kan også mista venstrefot Knut Spangelo Haga. (Foto: KVB)

Erik Kanestrøm har sagt nei til å spela for Os i 2018. Årsaka er studier.

– Eg starta på eit treårig mastergradstudie i haust. I den dramatiske sesonginnspurten prioriterte eg fotball, men studiet er i Oslo og blir for tidkrevjande til at eg kan halda fram med denne treningsmengda, seier Erik til Midtsiden.

Han jobbar i bank og har gått ned i stillingsprosent for å fullføra mastergrad i leiarskap på deltid.

Nokre klubbar har vist interesse, men om han vil spela vidare for andre er førebels uvisst.

– Eg trener framleis kvar dag, og speler litt futsal med kameratar. Det kjem nok til å kribla litt i beina til våren, men om det blir spel for ein klubb så blir det nok i lågare divisjon og ein klubb her i Bergen, seier Erik, som bur i by'n.

Toppskårar nesten kvart år

Erik, som fyller 26 år i april i år, kom frå Søre Neset til Os som 15-åring.

Då han var 17 år skåra han 10 mål på ein halv sesong for Os 2. Same år, i 2009, debuterte han på A-laget, som rykte opp til 2. divisjon.

• I 2012 blei han toppskårar med 14 mål på 26 kampar
• 2013 skåra han 12 mål på 15 kampar, og gjekk til Nest-Sotra etter sommaren. Nest-Sotra rykte same haust opp til 1. divisjon.
• I 2014 var han tilbake på Os og blei toppskårar med 17 mål på 29 kampar.

I 2015 var Kanestrøm skadd i akilles og kne store delar av sesongen, og skåra berre 3 mål på 15 kampar.

I 2016 og 2017 var han toppskårar igjen, med 17 og 15 mål.

– Ein viktig mann, på og av banen

Os Fotball fekk beskjed før jul at Kanestrøm ville legga opp.

– Vi skulle gjerne hatt han med oss vidare, han er ein god spelar og ein fin fyr, ein leiarfigur både på og av banen, seier dagleg leiar, assistenttrenar og lagkamerat Endre Brenne.

– Men vi forstår at han må prioritera, og håper at andre fyller holet etter han.

Ved sidan av stor løpskapasitet og god venstrefot har Kanestrøm vore spesielt god på frispark og straffe.

Kan mista tre venstrebein

Utanom Kanestrøm har Os mista gutelandslagsspelar Ole Martin Lekven Kolskogen, som har signert med Åsane.

Knut Spangelo Haga (som fyller 20 år i år), også han med god venstrefot, har prøvd seg på høgare nivå, for Nest-Sotra, men der skal det førebels ikkje vera noko avgjort.

Ein annan frå 98-årgangen som Os må klara seg utan er Torgeir Lunde, då han skal i militæret i april.

Ein annan venstrefot som forsvinn frå Kuventræ er Glenn Krossøy, som legg opp eller trappar ned.

Han som skåra nest mest for Os i fjor (13 mål), årets spelar Christoffer Hafsås, er òg venstrefot. Han er signert og klar for 2018-sesongen.

Etter sesongslutt har Os signert éin ny spelar, Frode Storebø frå Austevoll.

Os sitt nye trenarteam består av hovudtrenar Karl Kvile og spelande assistenttrenar Endre Brenne. Martin Eidsvik skal leia Os 2.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.