Tre tjuveri på tre veker

Laurdag blei det oppdaga at to syklar var stolne frå ein eigedom nær Os ungdomsskule.

– Eg såg den eine sykkelen til ungane låg slengt på uteområdet til ungdomsskulen, og då eg sjekka om fleire ting var tatt oppdaga eg at også ein annan sykkel var vekke, fortel ein innringar.

Ho leitte utover kvelden i går, men har foreløpig ikkje funne den sakna sykkelen.

– Ei ny utfordring for oss

Det er berre tre veker sidan sist nokon stal frå eigedomen.

– Då var det ein sparkesykkel, ein litt kostbar til 750 kroner som sonen min hadde kjøpt for eigne sparepengar.

– Den fann vi igjen utanfor ungdomsskulen, men då var den heilt øydelagt.

Verken syklane eller sparkesykkelen var innelåst.

– Dei sto utanfor huset vårt. Tjuveri har aldri vore eit problem før, men det kan sjå ut som om det nye uteområdet til Os ungdomsskule trekk til seg mykje folk.

– Det er jo i utgangspunktet positivt, men synd om nokre av brukarane av området ikkje har respekt for andre sine ting.

– Eg har sølv sett ein av dei slenga ein sparkesykkel rett i den digitale veggen meint for leik med ball. Han gav eg tilsnakk.

– Har ikkje fått stå i fred

Tysdag 12. mai var dei første ungdomsskuleelevane tilbake på Os ungdomsskule etter koronapausen i vår.

Eit heilt nytt uteområde, utanfor nybygget Os Aktiv, sto klart til bruk.

– Vi gler oss over å sjå at området er flittig brukt på kveldstid etter skulen, og heile dagen no i sommaferien, sa prosjektsjef Frankie Taule Gindl då siste del av bygget, den komande møtestaden Ung Arena, før helga var ferdig.

– Men vi har dessverre sett ein del søl og litt hærverk.

Nokon har svidd gummidekket på basketballbanen, det er grisa utover dekket og enkelte dagar er det ein del boss på staden.

– Vi får håpa at folk skjerpar seg, og at Ung Arena fører til meir bruk av området, og mindre fare for hærverk.