Tredobla båtverkstad på Halhjem

Bildeserie:

1 av 5

Os Marineservice AS har vakse kvart år sidan oppstart i 2014, dei to siste åra (frå 2016 til 2018) frå 3,8 til 5,8 millionar i omsetnad.

No har gründer og eigar Morten Tøsdal fått langt større og betre fasilitetar.

– Vi ligg godt framfor fjoråret. Neste steg blir å søkja etter folk, seier Morten.

Frå 30 til 250 kvadratmeter verkstad

Med butikk, to slippar, ein verkstad på 70 kvadratmeter og eit naust som større båtar kan køyra heilt inn i, var fasilitetane gode.

– Men verkstaden er liten, i praksis berre 30 kvadratmeter, der alternativet for mellomstore båtar var å trilla hekken inn under tak.

Men etter at naboverksemda flytta frå området blei det mykje ledig plass.

– No har vi fått leiga ein etasje av eit naust og to etasjar avein dobbel garasje med god takhøgde, til saman 250 nye kvadratmeter.

– Vi vil utvida butikken inn i lokalet der vi til no har hatt vår einaste verkstad under tak. I tillegg til delar sel vi ein del påhengsmotorar frå Yamaha, der vi òg har fått mykje serviceoppdrag frå kundar som har kjøpt andre stadar.

Utvida marknad

Å vera mobil båtreparatør og -mekaniker var grunnideen, men Tøsdal fekk seg raskt verkstad, først i Kolskogen, så på Halhjem.

– Etter at vi flytta til sjød'n opna det seg ein større marknad, ikkje berre med vekst blant bedriftskunder innan fiske, dykking og oppdrett, men privatkundar frå Tysnes og Stord som legg båten til kai og spaserer til ferjekaien for å reisa heim.

– Men vi er framleis mobile, særleg med båt, og rykker ofte ut der kunden sin båt ligg.

I dag driv Morten saman med faren Olav, som han tilsette på kundemottak i fjor, og den erfarne båtmekanikeren Frode Haugan. Haugan jobbar skift på båt, og er på Halhjem på deltid.

– Det er god drift året gjennom, men høgsesong frå slutten av mars til ut august. Det blir lange kveldar, og i år har vi dessverre måtta seia nei til enkelte.

Tøsdal med mannskap jobbar ut neste veke, så tvingar dei inn to veker med fellesferie ved verkstaden.

– Vi tar i imot alle storleikar av båtar og motorar, og har som mål både å vera flinke å svaratelefonen og å halda det vi lover av tidspunkt. No er tida inne for å utvida staben.