Trekte ut 20 vinnarar i Os

Du har kanskje sett reklame for det forholdsvis nye, norske Postkodelotteriet, med Jorun Stiansen, som vann Idol året etter Kurt Nilsen, som frontfigur?

No har ho fått med seg etternamn-bror, tidlegare verdsmeister i slalåm, Tom Stiansen - og fredag var det fleire i Os som vann pengar i lotteriet.

Postnummer 5208, altså Søre Neset, har over 2000 adresser. 17 av desse hadde kjøpt lodd, og dei deler 100.000 kroner (5.883 kroner per lodd).

I tillegg blir det trekt ut ein postkode på same postnummer, og på 5208 var det tre heldige vinnarar som deler 250.000 kroner (83.334 kroner per lodd).

Ung vinnar som nettopp har kjøpt hus

Ein av dei tre er ifølgje postkodelotteriet.no ei 20 år gamal jente.

Ho skal nettopp ha flytta heimefrå og blitt sambuar, og fortel at ho venta til ho fekk eiga adresse med å delta i lotteriet.

Etter berre ein månad vann ho.

– Det blir vel til at eg kjøper noko ekstra til huset, sjølv om sambuaren min var tydeleg på at han meiner dette er mine pengar, seier ho i intervju med lotteriet.

Stiansen-duoen rakk ikkje sjølv å koma til Os for å dela ut pengane.

Postkodelotteriet har trekningar kvar veke. Deltakarane abonnerer med fast pris kvar månad. 50 prosent av netto omsetnad går til gode formål. Ved sidan av ordinær trekning blir dettre gongar i året ekstra stor gevinst, 10 millionar per postnummer, der halvparten går til postkode og kvart lodd kan bli verdt opptil 2 millionar.