Treng eit lite «puff»

Ein lystig gjeng var samla i Os folkebibliotek i dag.

– Kor kan vi finna om istjukkleik og trygge vatn då?

– Viss eg vil sjå om alt på eigedomen min er teikna inn på kartet då?

– Kan eg gå inn og sjå kva saker eldrerådet skal handsama?

Spørsmåla var mange, og Sigrun Bukkholm hadde svar. I alle fall på det meste.

Plass til fleire

Os kommunen lanserer sine nye nettsider frå 1. februar. Fire tysdagar framover har Os Senior Høgre booka møterom på biblioteket, og vil gje seniorar i Os opplæring i dei nye nettsidene. Primus motor er Ernst Hoff, og han administrerar også påmeldinga.

– Seniorane treng gjerne ein liten ekstra puff til å koma i gong, og no når dei kanskje akkurat har lært seg med dei nettsidene som er, så kjem det nye. Men vi har plass til fleire her, så folk er velkomne til å melda seg på framleis.

Gje gode vanar

– Vi gjer dette for at det skal vera enkelt å finna fram på dei nye nettsidene. Det er veldig viktig at folk blir vane med å bruka sidene, og dette vil kanskje ta bort litt av presset i kommunen. Viss alle berre nyttar nettsidene når dei treng informasjon, så finn ein faktisk det meste der.

Modell frå Oslo

Bukkholm, som til vanleg har arbeidsstad på rådhuset, leiar gjengen gjennom denne økta, og forklarar kor ein finn all nyttig informasjon av ymse slag.

– Hovudskilnaden er at på dei nye sidene kjem ein rett inn til tenestene. Vi har brukt samme modell som Oslo kommune har på sine sider. Dei tykkjer vi er gode og logisk oppbygd. Vi lagar trass alt sider for publikum, og treng ikkje finna opp nettsider som fungerar på nytt på kvar vår tue, seier ho.

– Det aller viktigaste? Å læra seg til å bruka søkjefeltet med det same. Då kjem ein langt, om ein ikkje umiddelbart ser kvar ein skal trykkja, avsluttar Bukkholm.