Triathlonfest på Ulven

For åttande gang blei Vestlandets vakraste triathlon, som den blir kalla, arrangert ved Sigurdsvikjo og på Ulven.

På Midtsiden si facebookside finn du over 300 bileter frå triathlon-festen

Rekordtida frå 2013 på 55:50 står fortsatt, men det var ikkje mykje om å gjera at Vetle Bergsvik Thorn frå Åsane Cykle klubb satte ny løyperekord med 59:49 på dei 750 metera symjing, 20 kilometerane på sykkelsetet og 5 kilometer med joggeskoa på beina.

Rekordpåmelding gav to startpuljer

Vetle Bergsvik Thorn vann herreklassa. Bak følgde Tor-Aanen Kallekleiv (1:04:11) og Ketil Odland frå Haugesund Triatlon klubb (1:05:13).

For første gang i historia måtte arrangørane dele starten i to, grunna den store påmeldinga. Kallekleiv starta i pulje to, fem minutt etter første pulja. Dermed måtte Odland trippa nervøst rundt i målområdet før han fekk vita om han tok sølv eller bronse.

I kvinneklassa var Karen Nygård Magnussen frå Bryne Triathlon Klubb best med tida 1:09:32. På andre og tredje plass kom Elin Steinsbø Fylkesnes frå Team Fusion Noreg (1:11:50) og Malene Knutsen Breivik frå Haugesund Triathlon klubb (1:18:36).

Komplett resultatliste finn du her

Mange debutantar

Midtsiden møtte i målområdet mange av dei som for første gang gjennomførte eit triathlon. Dei rapporterte om ei kjekk, men hard oppleving.

– Det vanskelegste var faktisk skiftet mellom dei forskjellige øvingane. Ein ting eg lærte i dag er at det ikkje er lurt å ha for stramme sokkar når du skal skifte frå symjing til sykkel. Det er nemleg vanskeleg å få på seg det når du er blaut på beina.

– Eg fekk krampe i båe leggane dei første 100 metra på løpinga, men det kom seg når eg kom bort på Ulvensletta, fortalde ein annan.