Trine Lindborg og Harald Lekven, her på valdagen, blir første ordførar og varaordførar i Bjørnafjorden kommune. (Foto: Kjetil Vasby Bruarøy)

Trine Lindborg (Ap) blir ordførar i Bjørnafjorden kommune

Fem parti har blitt einige. Harald Lekven (Sp) blir varaordførar.

Av: Kjetil Vasby Bruarøy

Etter valet måndag for ei veke sidan sto vi igjen med 3-4 realistiske alternativ til kven som kunne ta makta i komande Bjørnafjorden kommune.

Søndag kveld kunne Bergens Tidende avsløra at Terje Søviknes (Frp) er ferdig som ordførar etter 20 år. 

Fem av dei sju partia som fekk plass i Bjørnafjorden kommunestyre blei etter eit rundt fire timar langt møte i Os rådhus søndag kveld einige.

Den nye kommunen skal styrast av Ap (8 mandat), Sp (5 mandat), MDG (3 mandat), SV (1 mandat) og KrF (1 mandat).

Ny ordførar blir Trine Lindborg (AP), Harald Lekven (Sp) blir varaordførar.

– Einige om dei store linjene

Trine Lindborg fortel om felles møte mellom alle dei fem partia både torsdag, fredag og i går.

– Vi har brukt tid på å bli kjente med kvarandre, representantane frå Fusa og Os. Politisk veit vi at vi har mykje til felles, seier Lindborg til Midtsiden dagen derpå.

– Vi har kvar våre kjernesaker, men i lokalpolitikken opplever eg at vi er einige om det meste. Vi i Ap er fristilte til å ta våre vurderinger lokalt.

Sp får varaordførar og leiar av plan- og byggningsutvalet

Lindborg kunne måndag morgon ikkje seia noko om kven som får posisjon i kva utval.  Kampen om ordførarstolen blei ikkje hard.

– Vi meiner det låg i korta at Arbeidarpartiet skulle ha ordføraren, og hadde som krav at vi fekk varaordføraren, seier Lindborg si nye høgrehand, Harald Lekven.

– Vi hadde samtalar med Høgre og KrF òg, i eit meir sentrumsbasert alternativ, men kom ikkje i mål.

I tillegg til varaordføraren får Senterpartiet leiar av plan- og bygningsutvalet.

– Det er ikkje heilt spikra, men det er klart at Terje Sperrevik, med si lange erfaring, er ein god kandidat for oss til å leia dette utvalet.

Både ordførar og varaordførar er representert i formannskapet, i tillegg skal Ap ha fått leiaren av tenesteutvalet.

Var i samtalar med Høgre

Dei fire største partia etter valet er Frp (12 mandat), Ap (8 mandat), Sp (5 mandat) og Høgre (5 mandat).

Ap og Sp var i sonderingsmøte med Høgre, noko som ville gjeve 18-17-fleirtal, og tok i tillegg med seg KrF sitt eine mandat.

Dei blei ikkje einige.

– Vi ville ha ordføraren. I samtalane kom det òg fram tydelege forskjellar på Ap og Høgre, seier Marie Lunde Bruarøy (H).

Kva blir forskjellen?

Lindborg seier ho er glad for at dei fem partia fekk danna eit fleirtal, noko ho ønskjer skal skapa ei retningsendring i forhold til politikken som har vore ført i Os dei siste 20 åra.

– Av større og mindre saker i Os som har fått mykje merksemd, og der det har vore semje i opposisjonen i Os, er bygging av kjøkken på Luranetunet, motstand mot bru over Bjørnafjorden og bevaring av Fjellheim. Kva område vil veljarane først merka ei endring? Er Fjellheim redda og skal Os ut av Hordfast?

– Vi har sagt at vi ønskjer å fylla Fjellheim med glede og aktivtet, men det blir for tidleg å seia noko konkret om enkeltprosjekt i ein så stor kommune som vi er i ferd med å bli, seier Lindborg.

I nye jobbar

Trine Lindborg (54) går frå jobb i Equinor når ho blir ordførar.

Harald Lekven (62) pensjonerte seg frå Politiet i 2014, og jobbar deltid for Haakonsvern i Ulven leir.

– Det blir ein ny kvardag, så får vi sjå kor mykje varaordførar-rolla vil krevja av tid.

Det har tidlegare vore diskutert å auka varaordførarstillinga til 100 prosent, men samarbeidsutvalet for Bjørnafjorden kommune har førebels nøya seg med å auka den frå 20 til 30 prosent.

Fleire saker