Os Fotball har via @1_2osablod på Instagram oppdatert flittig frå treningsleiren - her før kampstart i dag. (Foto: Os Fotball)

Trivsel og tempo i Tyrkia

Os Fotball er på treningsleir med tre lag. I dag spelte A-laget ein sterk kamp mot tjekkisk motstandar frå høgare nivå.

image
image
image
image
image
image
image
image
image
image
Av: Kjetil Vasby Bruarøy

I år som i fjor har Os Fotball tatt turen til Side i Tyrkia med både A-laget, Os 2 og damelaget.

Os 2 fekk ikkje anna enn internkamp under opphaldet, damelaget har slått eit tysk lag 6-1 og A-laget har nettopp kome til hotellet etter treningskamp mot tjekkiske MFK Frýdek-Místek.

– Laget har stort sett spelt på nest øvste nivå i Tjekkia, men rykte ned til tredje nivå i fjor. Eg reknar med at vi får god motstand, sa Endre Brenne til Midtsiden før kamp.

Os - MFK Frýdek-Místek 0-1 (0-0)

Os tapte, men Brenne er nøgd med prestasjonane.

– Vi heada inn ein corner, men på merkeleg vis blei denne annulert for offside, utan at eg forstår korleis det skal gå an - og vi missa på straffe. Rette etterpå kom mål imot.

– Eg synest vi skapte mykje, spesielt før pause, og vi var flinke til å variera i angrepsspelet vårt. Vi møtte eit vaksent og robust lag, og eg er nøgd med korleis vi framsto i dag, på tampen av ein lang treningsleir.

Os frå start: Chris Sunde Midtun - Anders Havsgård, Vegard Skeie, Carlos Mendes (Portugal, prøvespel), Alexander Tøssebro - Rune Mo - Marius Mikkelsen, Steffen Kvamsdal - Sander Kvittingen, Roger Ekenes, Mats Cato Moldskred.
Innbytarar med speletid: Petter Austevoll, Kristoffer Røttingen, Trym Hjørnevik, Tobias Nøss, Elias Myrlid og Thomas Færøvik (debut).

Ikkje alle i A-stallen har vore med til Tyrkia; Frode Storebø, Rafael Villén, Alexander Dale, Torgeir Lunde og Øystein Takle Eide er heime i Os, Harry Moore er med, men trener alternative øvingar grunna skade.

– Carlos Mendes kom frå Portugal til Tyrkia for å trena med oss denne veka. Han skal heim etter treningsleiren, men han har gjort godt inntrykk, og vi skal i vidare samtalar, seier Brenne.

Lite sol, men gode treningsforhold

Fredag formiddag var det sol, svak vind og 16 varmegradar i Side.

– Mange var glade for at finvêret kom, det har vore grått og ein del dagar med våte banar tidlegare i veka. Men dei som skulle spela i dag fekk forbod mot å jobba med brunfargen, fortel Brenne.

Sjølv om spelarane sikkert kunne tenkt seg fleire dagar med noko som liknar på sydenvêr, synest han det har vore greit treningsvêr.

– Vi tok ein samla joggetur alle tre laga laurdag då vi kom ned her, seinare har det stort sett vore to økter per dag. Tysdag var vi og køyrde gokart, onsdag var det tid for den prestisjetunge quizen.

– I treningsarbeidet har vi hatt fokus på vidare arbeid med det vi har øvd på heime, og noko arbeid med struktur.

– Sosialt ser vi at det er suksess å reisa ei så stor gruppe på tur saman!

Alle dei tre laga frå Os har skrive fyldige og morosame dagsrapportar på osturn.no.

I kveld er det tid for den tradisjonelle debutant-kvelden, der spelarane som er førstereis med Os Fotball kvar og éin må opp og underhalda dei resterande av reisefølgjet på 57 spelarar og trenarar. Laurdag klokka 08.30 set dei seg på buss mot flyplassen og heimreise.

Fleire saker