Trond Budal har signert tidlegare Stord-spelar

Siri Eide Børtveit har skapt problem for Os før.

Trond Budal har fått sving på dei «nye» Osdamene. No får han inn ein keeper han håper kan gi spelarane både tryggleik og inspirasjon. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 21. des. 2019 12:28

Handballdamene til Os blir styrka med keeper Siri Eide Børtveit (21).

– Vi har signert avtale om lån frå Årstad ut mars 2020, fortel Os-trenar Trond Budal.

Børtveit er opprinnleg frå Stord, der ho debuterte på seniorlaget i ung alder, og har vore tatt ut på aldersbestemte landslagssamlingar.

Hausten 2016 skapte ho problem for Os i kamp mot Stord, der Os blei kontra i seink og tapte 33-17 etter fantastisk keeperspel av motstandaren.

Drahjelp

Etter generasjonsskifte sommaren 2018 og nedrykk til 3. divisjon våren 2019, mista Os endå fleire av dei erfarne spelarane frå årets sesong. Store delar av Os sitt lag var debutantar ved seriestart, men laget har klart seg greit, tatt 7 poeng på 11 kampar, og spelt uavgjort med serieleiar.

– Vi er òg heldige som har tre keeperar, sett vekk frå at Julie Hjertholm Lindborg blei skadd i kneet førre helg og er vekke i rundt ein månad.

Budal ville likevel styrka keeper-stallen.

– Amalie Evensen ønskjer helst å spela ute, Maia Emilie Heimtun Skudal kan i periodar få stor kampbelasting med både J17 og J17-20 ved sidan av senior.

– Vi har vore i dialog med Siri før, då ho flytta til Bergen for å studera. Men då signerte ho med Viking og blei lånt tilbake til Stord.

– Siri er god mellom stengene og flink til å kommunisera med forsvaret. Eg trur at ho vil gi laget ein tryggleik i kamp, og at ho i treningsarbeidet skal gi drahjelp og inspirasjon til både utespelarar og dei andre keeperane våre.

Speleklar i januar

Avtalen kom i boks før helga. Siri Eide Børtveit blir truleg å sjå mellom stengene i Oshallen allereie i første heimekamp på nyåret.

Den går tysdag 7. januar mot Kjøkkelvik.

• Terminliste og tabell

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.