Trur du at det skal koma gangfelt her?

Bildeserie:

1 av 2

Innbyggarar har engasjert seg på Facebook og politikarar har stilt spørsmål til administrasjonen; kjem det ikkje gangfelt over Ulvenvegen mellom Irgenskrysset og den nye Spar-butikken i næringsområdet Kloppamyra?

Butikken opna torsdag 12. april. Mellom parkeringsplassen og fylkesvegen er det tydeleg kvar mjuke trafikantar skal bevega seg og kryssa vegen, men verken skilt eller kvite striper er på plass.

Dette var eit rekkefølgjekrav då søknaden om butikketablering blei godkjent av plan- og bygningsutvalet. Det var også gangfeltet, men vegkontoret ville ikkje bygga dette før dei hadde tal på fotgjengarar ETTER opning, og butikken fekk opna på dispenasasjon. No er det usikkert om gangfelt kjem.

Gangfelt kan gi auka risiko

Om du trudde at etablering av gangfelt var eit trafikktryggleikstiltak, så trudde du feil. Gangfelt blir sett på som eit framkommelegheitstiltak, altså for å sikra at fotgjengarar i det heile tatt klarer å kryssa vegen om biltrafikken er høg og det er mange mjuke som vil kryssa vegen.

– Det er gjort forsking og utført analysar på dette. Normalt går risikoen ned ved oppmerking av gangfelt, men den kan òg gå opp. Det avhenger av fleire forhold, som fart, sikt og talet på kryssingar, fortel Bente Isdal frå Statens vegvesen.

Det viser seg at fotgjengarar er mindre flinke til å sjå om det er trygt å kryssa vegen om det er skilta som gangfelt, dei tar det gjerne for gitt at bilane viker. Om det i tillegg blir etablert gangfelt ein stad der det er få som krysser vegen så blir bilistane sløve, dei reknar ikkje med at det kjem nokon å vika for.

85 % av ulykker i gangfelt kjem av at bilistane seier dei ikkje såg fotgjengaren. 9 av 10 som blir påkøyrd i 35 km/t overlever, men berre 2 av 10 overlever om dei blir påkøyrd av ein bil som held ein fart på 50 km/t.

Kjelde/les meir: Veiledning - kryssingssteder for gående (PDF)

Treng 20 kryssande fotgjengarar - i timen!

Det er likevel ikkje umogleg at Statens vegvesen vil laga gangfelt ved Kloppamyra.

– Vi har lagt til rette for gangfelt og vi har planlagt med begge alternativ, med og utan gangfelt, fortel Isdal.

Som då det i 2010 blei diskutert å laga gangfelt på Lepsøyvegen på Sundøy, ved brua mellom Sundøy og Bruarøy, har vegvesenet fleire undersøkingar som skal gjennomførast før det blir bestemt om det kjem gangfelt eller ikkje.

– Om det er høg biltrafikk og mange som krysser vegen så aukar sjansen for at det blir etablert gangfelt.

Førre trafikkteljing viser 3900 bilar i døgnet på Ulvenvegen. Ifølgje tabellen bør det, i den timen i døgnet med flest kryssande fotgjengarar, vera 20 eller fleire som kryssar vegen.

– Vi vil venta litt med å ta ei teljing, til folk venner seg til at det har kome ein butikk der, og til mengda kryssande gjerne har auka. Dette blir truleg utført om cirka ein månad. Men det blir ikkje førehandsannonsert, vi ønskjer ikkje å risikera at nokon engasjerer seg i eine eller andre retningen, vi treng reelle tal!

Om det ikkje blir mange nok kryssande på første teljing, blir det ny teljing nokre månadar seinare.

Bør ikkje køyra fortare enn 45 km/t

Det er fartsgrense 50 km/t forbi Kloppamyra, men det er ikkje lenge sidan området var overgang mellom 50-sone på Strønevegen og 80-sona på Ulvensletta, og enkelte har kanskje for vane å aksellerera akkurat i dette området.

Vegvesenet vil òg måla farten på bilane som køyrer forbi. Her bør 85 % av bilane køyra i 45 km/t eller saktare.

– Elles må vi sjå på fartsreduserande tiltak.

Er sikta god nok?

I møte i tenesteutvalet i Os kommune onsdag spurde Sandra Kristin Austgulen (Ap) om planane for gangfelt ved Kloppamyra.

Kommunalsjef Aina Tjosås fortalte om utfordringar med sikt langs vegen, då denne går ned i ein dump.

– Vi har vurdert sikta som god nok til gangfelt, men vi vurderer likevel å heva vegen lengre nede, ved avkøyrsla til Kloppamyra, fortel Isdal.

Det blir i skrivande stund jobba med saka, og siste utkast med tekniske teikningar er nyleg ferdig.