Turgåar henta med hundepatrulje

Torsdag klokka 17.23 blei politiet kontakta av ein turgåar som hadde gått seg vill.

– Han hadde gått opp frå Hovland og var på veg til Høglikampen, fortel operasjonsleiar Eivind Hellesund til Midtsiden.

Ein stad på vegen hadde han svingt feil og hamna ut i terrenget. Mannen fann ikkje tilbake til stien.

– Han stoppa heldigvis mens leiken var god, og hadde gode klede og bra med batteri igjen på mobiltelefonen.

Politiet rykte ut med hundepatrulje. Dei hadde med seg GPS og rikeleg med lys.

– Hundeførar fann mannen utan problem. Han var uskadd og har no kome ned igjen.