Delar av publikum mens The Prodigy var på scenen fredag kveld. (Foto: Kjetil Vasby Bruarøy)

Tysnesfest hadde 5.500 færre gjestar enn i fjor

– 2017 var ekstremt, dette er nesten 2016-nivå, og tal vi kan leva med.

image
image
Av: Kjetil Vasby Bruarøy

Årets Tysnesfest er over og publikumstalet er offentleggjort.

Heile 26.693 besøkte Våge, Gjerstad og resten av øya frå onsdag til søndag.

Dette er fleire enn i 2015, ikkje så langt unna 2016 (27.715), men eit godt stykke frå publikumsrekorden i fjor, som var på 32.233.

– Vi hadde nesten 27.000 gjestar i år, og vi har aldri fått så mange gode tilbakemeldingar på sjølve gjennomføringa. Men vi er jo ikkje mindre sjuke i hovudet enn at vi håper på rekord kvart år, så det er jo litt skuffande, innrømmer festivalsjef Sigvard Madsen.

Samtidig seier han at festivalen går rundt i år òg.

– Men vi treng eit visst volum for å få alt til å gå i hop. Vi bemannar hamn, festivalområde og camp etter tal frå i fjor, noko anna hadde vore galskap. Men då kostar det også litt å gjennomføra festivalen utover det vi har brukt på å booka artistar.

Uviss årsak

Madsen fortel at det ikkje er enkeltdagar som skil seg ut, men at dei låg litt under fjoråret kvar dag.

– Tidlegare år har vi opplevd dårleg vêr, i fjor hadde vi avlysing av siste artist grunna kraftig vind.

– Fotball-VM kan òg ha gjeve oss litt konkurranse, dessutan har vi eit nytt betalingssystem i hamna som kanskje har blitt oppfatta som litt komplisert, og vore med på å ta ned besøkstalet litt.

Mykje å gle seg over

Festivalsjefen synest samtidig det er mykje å gle seg over.

– At vi for første gong på mange år ikkje fekk ny rekord får våga seg, vi var nesten på 2016-nivå, vi har hatt tett med gode arrangement og vi håper mange har hatt ei kjekk langhelg på Tysnes.

Han trekk spesielt fram gratiskonserten med Bigbang for 2400 turgåarar på Tysnessåta torsdag som eit høgdepunkt.

– Eg vil samidig takka alle dei som står på for å gjennomføra arrangementet, fleire hundre er i sving kvar einaste dag for at gjestane skal ha det trygt og godt.

 

Fleire saker