Kattugle blei sothøne - men såg ut til å klara seg bra etter at Ragnar Lyssand fekk berga den ut. (Foto: Privat)
Kattugle blei sothøne - men såg ut til å klara seg bra etter at Ragnar Lyssand fekk berga den ut. (Foto: Privat)

To ugler blei redda i helga

Den eine var rein og fin, den andre har hatt fleire dagar i røyken.

Kjetil Vasby Bruarøy
09. mars 2020 - 10:58

Fredag var fuglemerkar Ragnar Lyssand på Rød og redda ei kattugle ut av ein skorstein, søndag rykte Os brannvesen ut til Storum i liknande ærend.

– Det gjekk greit å ta den ut, den var ikkje så stor. Den var heller ikkje prega av sot, slik dei ofte er, seier Martin Østgulen Svendsen frå Os brannvesen.

Denne ugla blei redda ut av ein skorstein på Storum i går. (Foto: Os brannvesen)
Denne ugla blei redda ut av ein skorstein på Storum i går. (Foto: Os brannvesen)

Ragnar Lyssand henta ut ei meir prega ugle.

Fleire dagar i røyken

– Dei som bur i huset høyrde nokre lydar frå skorsteinen, men har fyrt i omnen kvar dag i det siste, fortel den pensjonerte politimannen.

Han tok med seg kraftig lys. Dette gjer ugla meir passiv når den kjem ut av feieluka.

– Feieluka er i botnen, så den har ikkje hatt det for varmt. Men den var heilt dekka av sot.

Den erfarne fuglemerkaren tok ugla med seg heim, sjekka vinger og fjør, merkte den og sleppte den fri frå altanen.

– Den såg uskadd ut, og fauk fint av garde. Med mindre den har fått for mykje sot i lungene, vil den nok klara seg bra. Eg gjorde ikkje noko forsøk på å vaska den, sidan det var meldt regn tenkte eg at den ville klara seg sjølv. 

Merkte 12 ugler i fjor

Lyssand har drive med fuglemerking i nesten 40 år. I fjor merkte han 300-400 fuglar, 12 av dei var kattugle-ungar.

– Kattugle i pipa er dessverre litt vanleg. Dei trivst nær folk, det ser vi på uglekassane vi har ute. Vi kan setja opp kassar langt ute i skogen, utan at det kjem ugler i den. Mens ein av dei sikraste stadane vi har, er på vedlageret på ein av gardane i Os. 

Uglene st ofte på skorsteinar, truleg for å halda utkik mens dei jaktar. Så skjer det noko som gjer at dei ramlar nedi skorsteinen, og den kan vera vanskeleg å få seg ut av.

– Ofte er det brannvesenet som får desse oppdraga, men enkelte ringer rett til meg. Men den verste fienden til ugla er måren. Kjem det uglereir innanfor måren sitt revir, kan den ta både egg, ungar og foreldra.

Fleire prosjekt

– I fjor fekk eg òg telefon frå Øyane, der ein kar hadde fanga ein spurvehauk som kom inn i garasjen hans. Han kom inn til meg så den blei merkt, så tok han den ut i Øyane og sleppte den fri igjen.

lyssand gler seg over at makrellterna ser ut til å vera på veg tilbake til skjergarden i Os, og held òg på med eit kartleggingsprosjekt for vipebestanden.

– Vipene blir tatt av slåmaskiner og rev, men i fjor var det noko hekking, men berre éin stad i Os. No nærmar det seg tida for å bygga reir igjen, så det blir litt å følgja med på i vekene som kjem.