Unge gründerar: Bjørnafjordingane briljerte

Under fylkesmeisterskapen for ungdomsbedrifter blei det kåra vinnarar i 15 kategoriar. I kategorien «yrkesfag» dominerte to skular frå Bjørnafjorden kommune på pallen.

«Fjorden industri og reparasjon» frå Fusa vgs fekk 1. plass, «Tangos Ub» frå Os vgs – service og samferdselslinja vart nummer to.

Med dreiing, fresing, sveising og montering produserar, reparerar og utviklar Fjorden industri og reparasjon mekaniske delar og komponentar til industri og privatpersonar.

Juryen hadde følgjande å seia om den unge Fusabedrifta:

Bedrifta framstår som ei fullverdig bedrift innen sitt fagfelt, mekanisk industri. Dei produserer, reparerer og utviklar produkt på oppdrag frå privatpersonar og bedrifter i sin region. Bedrifta sitt overskot vert nytta til nytt materiell og veldedig formål. Alle medlemmene i bedrifta har mål om læreplass, dei fleste har alt fått den.

Tangos Ub frå Os vgs har eit ønske om at sjokolade skal bli spist med godt samvit. Med dette har Tango's UB i samarbeid med SIW RAW utvikla ein sjokolade utan sukker og full i proteinar. Tangos Ub jobber òg med å få ein miljøvenleg emballasje.

Nødvendig praksis

Fagansvarleg for videregåande skule i Ungt Entreprenørskap Vestland, Ingrid Stensnes, virkar til å vera nøgd med årets deltakarar.

– Alle ungdomsbedriftene som har vore på meisterskapen i dag har gjort ein strålande innsats. Eg er spesielt imponert over korleis bærekraft ligg i blodet til elevane, seier Stensnes.

– Ungdomane har skapt sin egen forretningside, registrert bedriftene i Brønnøysundregisteret, utvikla produkt, sett opp budsjett og kome i gang med salet. Dei har køyrd styremøte og stått for dagleg drift.

– Gjennom Ungdomsbedrift lærer elevane ved å setja teori ut i praksis. Dei tar ansvar for eiga læring og eiga verksemd. Du kan ikkje læra innovasjon og entreprenørskap ved berre å lesa om det – du må praktisera, seier Stensnes.

Ungt Entreprenørskap er ein ideell organisasjon som ein finn i heile landet, og i heile utdanningsløpet. Dei presenterer seg på denne måten:

Ungdomsbedrift er eit av fleire program vi tilbyr. Vi samarbeidar med skule, næringslivet og andre aktørar for å utvikla barn og unges kreativitet, skaparglede og tru på seg sjølv. Ungt Entreprenørskap er ein brubyggar mellom skule og arbeidsliv. I Noreg når vi årleg ca. 150.000 elevar og studentar, vi samarbeidar med 15.000 lærarar og 20.000 frivillige frå arbeids- og næringsliv.