Unik butikk i Landboden

Bildeserie:

1 av 10

Rett før helga fekk Os sentrum eit tilskot på handelsfronten.

I dei gamle røyrleggar-lokala i Landboden har Ewa Krupa-Papierniak opna Unique Boutique.

Vil tilby noko nytt

Ewa er frå Polen, og fortel på klingande god norsk at ho har budd i Noreg i åtte år.

Tidlegare har ho jobba i barnehagar, men no står ho bak det siste tilskotet i rekkja av nyetableringar i Os sentrum.

– Vi opna førre fredag - det vart ikkje tid den store markeringa, men no er eg altså i gang.

Ewa fortel at tanken bak butikken var å kunna tilby noko nytt til Os, og Os sentrum.

– Nett no er det berre meg som jobbar i butikken, men draumen er å kunna utvida etterkvart. Eg har allereie ei liste med søkjarar, så det står ikkje på interessa.

Barneklede, leiker og hobby

I Unique Boutique finn du eit godt utval i barneklede, utstyr til barnevogn og diverse hobbyartiklar.

– Eg sel barneklede til aldersgruppa 0-14 år, og kundane vil finna klede både til fest og kvardags. No i oppstarten er det nok størst utval til jentene, men etterkvart vil eg nok få inn klede til gutar òg.

Noko til gutane har butikken uansett; midt i butikken finn du tøffe leikebilar.

Med første augekast ser dei ut som modellbilar, men dei er faktisk basert på mykje det same som Lego.

– Ja, det er fleire som har trudd at dei er «vanlege» leikebilar, men desse bygger du sjølv, fortel Ewa.

– Konseptet er det same som eit byggesett frå Lego, men produsenten er polsk. Faktisk er desse setta kompatible med Lego-klossane, så du kan bygga dei saman.

Polsk og spansk

Ewa seier at sjølv om mange av varene er «kjende» for folk flest, er kanskje merka nye og og ukjende for mange.

– Eg satsar mykje på kjende polske og spanske merke. Dette gjer at eg kan tilby kvalitetsvarer til særs gode prisar, avsluttar den nye butikkeigaren.