Unike «Ideal» til kai i Os

Nybygget er laga etter 110 år gamle teikningar frå Rosendal.

Ideal ved ankomst fredag ettermiddag. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 22. aug. 2020 10:13

Fredag ettermiddag la skonnerten «Ideal» til kai i Os hamn. Om bord var Geir Arne Veglo frå Os, på kaien sto kona Hilde og kameraten Reidar Berg.

– Eigar og båtbyggar Rune Torgeirson er ein kamerat av Geir Arne. Tidlegare i sommar var vi med på første seglas med gjestar, saman med blant andre Reidar og Tone frå Os, fortel Hilde.

Reidar (t.v.), hamnevert Hans Parnefält og Hilde Drange Veglo. (Foto: KVB)

Rune Torgeirson og sambuar Kari Moe Sundli står bak båtbygginga saman med «Skonnert Ideals venner».

Den 120 fot lange skonnerten er nemleg eit nybygg, den største trebåten som er bygd i Noreg dei siste hundre åra, sjøsett i Kristiansund i 2016 og innreidd mens den låg på sjøen.

– Alt er handlaga, til og med taljene. Båten har lugarar til 30 personar og mannskap på 5, fortel Hilde.

Geir Arne kasta trossene i land. Tidlegare i sommar hadde han familie og venar med på seglas. (Foto: KVB)

Båtbyggar er frå Oslo, og har tidlegare bygd ein colin archer. I Hardangerfjorden blei han og sambuar Kari kjent med historia til Skaalurens Skibsbyggeri i Rosendal. Skaalurens bygde ei rekkje raske seglarar til norske reiarar tidleg på 1900-talet, blant anna «Ideal» og «Rosenheim», som Torgeirson fekk tilgang til teikningar på.

– Neste stopp på veg til Oslo blir Rosendal, der dei skulle deltatt på ein trefestival som dessverre er avlyst.

«Ideal» skal fungera som heim for Rune og Kari - som vil bruka skonnerten til skuleskip for ungdom.

Tekniske data
Skipstype: Tremastet slettoppet skonnert
Byggeår: 2014-2019
Sjøsett: 2016
Byggestad: Saltkaia Kristiansund
Lengde: LOA 148 fot / 45,00 m. LOD 120 fot / 36,00 m.
Breidde: 23,5 fot / 7,15 m
Djupne: 3,50 m.
Mastehøgde: 26 m
Seglføring 11 segl. Seglareal: 556 m2
Hovudmaskin: Scania DSI14 450hk. Generator: Nanni QLS13T 9,5kw
Deplasement: 160 tonn
Tonnasje: 125 brutto registertonn (BRT)
MMSI nr. 257050180
Kallesignal: LFGP

«Ideal» blei sjøsett i 2016 og blei i vinter ferdig innreidd. (Foto: Hans Parnefält)

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Knappe 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.