Utan lappen for 9. gong

Laurdag 5. mai hadde politiet fleire trafikkontrollar i Os, men det var mellom postane dei møtte den største syndaren.

På Ulvenvegen, i ei rekkje med bilar i motgåande kjøreretning, såg ein av politibetjentane ein person bak rattet som vedkomamde betjent visste ikkje hadde førarkort.

Patruljen snudde, men fann ikkje bilen igjen. Mistenkte blei kontakta per telefon og han nekta for å ha kjørt bil.

Tiltalte møtte ikkje i retten då saka mot han var oppe i Nordhordland tingrett torsdag.

Politibetjenten var einaste vitne og retten festa lit til hans forklaring. Tiltalte har mista førarkortet fleire gongar og det er nokre år sidan sist han hadde lov til å kjøra bil.

Han har også blitt tatt for å kjøra utan førarkort heile åtte gongar tidlegare, fire gongar der det førte til dom, tre det forelegg blei vedtatt.

"Tiltalte viser en totalt mangel for respekt for vegtrafikklovens bestemmelser om forbud mot kjøring uten førerkort. Det finnes ingen formildende omstendigheter" står det i dommen, som samrøystes finn tiltalte skuldig.

Mannen blei dømt til fengsel i 24 dagar.