Utforkøyring på Bjørnavegen

Rett etter at politiet var ferdig å dirigera i rundkøyringa ved Meny torsdag morgon, kom det melding om bil i fjellvegg i Bjørnavegen.

– Bilen hadde heldigvis hatt låg fart, så det var ingen personskade, fortel politioverbetjent Atle Birkeland.

Men bilen hadde større skader, og førar, ein mann i slutten av 20-åra, er meldt for uaktsam køyring.

– Det blei ikkje førarkortbeslag på staden, men det er nok ein sjanse for at han blir ilagt eit forelegg.

Blei pressa til punktering

Politiet reiste til Bjørnavegen klokka 08.45. Litt over klokka 9 kom det melding frå Halhjem ferjekai.

– Ein bilist somakkurat hadde køyrd av ei av ferjene forklarte at han følte seg pressa inn i ein fortauskant eller ei refuge.

– Det er ei innsnevring ved busshaldeplassen, og denne førte til at det blei litt trangt.

Bilen punkterte i kontakt med betongen.

– Vi vil blant anna undersøkja videoopptak frå staden, for å finna ut kven som hadde vikeplikt og kven som køyrde den andre bilen. Men det er mogleg at dette endar med at forsikringsselskapet overtar vidare oppfølging.

Pipebrann i Kvernhusrenen

Nærmare midnatt var det nok ein runde med blålys på Søre Neset.

Klokka 23.43 kom det melding om røykutvikling i ein bustad i Kvernhusrenen.

Dette viste seg å vera ein pipebrann.